Po’o maua se fa’asiliga ‘i le fa’aitīitiga ‘o lāfoga totogi?

‘E tusa ma le 3.5 miliona le aofa’iga ‘o tagata Niu Sila ‘o le ‘ā maua nai fa’asiliga ‘o tālā ‘iā lātou taga, ‘ina ‘ua ‘āmata le suiga fou ‘o lāfoga ‘e totogi, lea ‘ua fa’aitīitia ‘āmata atu ‘i le aso 31 Iulai. 

‘E 83 pasene ‘o tagata Niu Sila ‘e agava’a ‘i lea fa’amanuiaga mai le 14 piliona tālā ‘ua fa’aagaga ‘e le Mālō mō lea polokalame, ma ‘e ‘āmata mai le ta’i $12.50 le fa’asiliga ‘i le vaiaso, ‘e fua ‘i tūlaga ‘e agava’a ‘i ai le tagata totogi lāfoga.  Na tā’ua ‘e le Palemia Christopher Luxon, ‘o ana fa’asiliga ‘o le ‘ā maua mai ana lāfoga, ‘o le ‘ā ‘ave ‘i fa’alāpotopotoga fesoasoani.  ‘O ia ma lona to’alua ma lona ‘āiga, na ‘āmata mai lava ‘ona fa’asoa atu le tele ‘o tupe ‘i isi tagata ‘ina ‘ua fa’ato’ā ta’i 20 o lātou tausaga.  Na tā’ua ‘e le Minisitā Chris Bishop, ‘o ana lāfoga ‘o le ‘ā maua ai se isi ipu kofe fa’aopoopo, ma ‘o le ‘ā fōa’i isi tupe ‘i ni fa’alāpotopotoga fesoasoani.  Na saunoa le ta’ita’i ‘o le Labour, ‘e iai lona talitonuga, sā lē tatau ‘ona fa’apaū lāfoga mā ‘e iai lona manatu, ‘o le taimi lelei lenei ‘e tatau ai ‘ona teu ma ‘inivesi.  ‘E talitonu Jan Tinnetti ‘o le Labour, ‘e sili atu le tele ‘o le gau ‘o tagata nai lō tupe ‘o lo’o lātou maua mai lea faiga.  ‘O lo’o siitia pea le tau ‘o le soifuaga, ma ‘e manatu ia, ‘e lēai lava se ‘ese’esega tele ‘o lo’o maua ai ‘e tagata Niu Sila pei ‘ona saunoa Dr Deborah Russell ‘o le Labour.  O lo’o iai ‘i le ‘upegatafā’ilagi ‘a le Mālō ‘i la lātou pāketi, le polokalame ‘o le tax calculator, ‘e mafai ‘ona siaki ai ‘e so’o se tagata po’o ia maua se fa’amanuiaga ‘ae pe fia fo’i lona aofa’iga.

Link to 1News (Article) translated by Savelina Kasiano: https://www.1news.co.nz/2024/07/30/extra-cash-in-new-zealanders-pockets-as-tax-cuts-kick-in-tomorrow/

ATA: 1 News (TVNZ).