Pito a’afia Māori ma Pasefika ‘i le Syphilis

‘Ua fa’aalia ‘e ‘au’aunaga Māori mō le soifua mālōlōina, ‘e māfua le pito tele ‘o pepe Māori ma Pasefika ‘e a’afia ‘i le syphilis, ‘ona ‘e lē saogalēmū feūsua’iga ma taugatā fōma’i.  ‘Ua fa’amauina le si’itia ‘o le nūmera ‘o ē a’afia ‘i lea fa’ama’i ‘ae pito sili ‘ona to’atele Māori ma Pasefika ‘e a’afia ai.  ‘O fa’amaumauga ‘i le fitu tausaga ‘ua tuana’i, na līpotia ai ‘e le vāega su’esu’e ‘a le ESR, ‘e 35 ē na a’afia ‘i le fa’ama’i, lea ‘e pasi atu ‘e le tinā ‘i le pepe. 

‘E 32 Māori ma Pasefika mai le aofa’iga ‘e 35 na a’afia ‘i le ma’i.  ‘O tūlaga ogaoga ‘e o’o ‘i ai pe ‘ā a’afia ‘i le ma’i, ‘e aofia ai le ‘uma ‘o le ola ‘o le pepe ‘a’o ‘i le manava ‘o le tinā, po’o le fānau lē au ‘o le pepe, po’o le matuā mama’i lava ‘o pepe fou fa’ato’ā fānanau.  ‘O lo’o fautuaina ‘e le Ngā Maia Trust le fa’aleleia ‘o ‘au’aunaga ‘a fa’atōsaga mō Māori, ma ‘ua tu’uina atu ‘e le pule ‘o lea ‘au’aunaga Tamara Karu, ni fautuaga ‘e fa’aitīitia ai tūlaga ogaoga ‘e o’o ‘i Māori ma Pasefika ‘ona ‘o le fa’ama’i.  ‘E ta’i lua fā’ata ma su’esu’ega ‘e faia ‘i le taimi ‘o le ma’itaga ‘o le tinā mō lea fa’ama’i ‘i le Motu ‘i Mātū ‘ae ta’i fa’atasi ‘i le Motu ‘i Saute. 

‘O le Syphilis ‘o se siama ‘e māfua mai ‘i le Treponema pallidum ma ‘e tele lava ‘ina pasi atu ‘i feusua’iga.  ‘Ua fautuaina ai tinā ma’itaga ‘uma ‘ina ‘ia fa’afeso’ota’i a lātou fa’atōsaga ma ‘aua le fa’atali se’i fa’ato’a va’aia ni āuga ‘o lea fa’ama’i.   

Link to RNZ (Article) translated by Savelina Kasiano: https://www.rnz.co.nz/news/national/528243/syphilis-hitting-maori-and-pasifika-the-hardest

ATA: RNZ / Elsie Williams.