Pei ‘ua lē fa’atuatuaina le Fono mō le Puipuiga ‘a Mālō ‘Aufa’atasi – Helen Clark

Na tali le Minisitā ‘o le Vā ‘i fafo, Vaovasamānaia Winston Peters ‘i se tasi na ‘avea ma palemia ‘o Niu Sila, Helen Clark,  ‘o lo’o taumafai le mālō ‘i le lelei ‘e gata mai ai ‘ina ‘ia fesoasoani ‘e fa’amuta le tūlaga faigatā ‘o lo’o iai nei ‘i fe’ese’esea’iga ‘a ‘Isarā’elu ma Pālesitina.  Na saunoa Clark, lē sā fa’auluulu ‘i ai le Polokalame ‘o Ātīna’e ‘a Mālō ‘Aufa’atasi, ‘ua fesiligia le tūlaga lē fa’amāoni ma le lē fa’atuatuaina ‘o le Pūlega po’o le Fono mo le Puipuiga ‘a Mālō ‘Aufa’atasi ‘e fa’atatau ‘i le taua ‘a ‘Isarā’elu ‘i Gaza. 

‘O se tūlaga lē lelei le lēai ‘o se gāioiga ‘o faia ‘e fa’atino ai le fa’ai’uga 2735 ‘a le fono mō le Puipuiga ‘a Mālō ‘Aufa’atasi ‘e vala’au ai ‘ina ‘ia tāofi ma fa’amuta le taua ‘i teritori ‘o Gaza ‘o nofoia ‘e Pālesitina.  ‘O lea saunoaga ‘a Clark na faia ‘i Niu Ioka ‘i le taeao analeilā.  ‘E tatau fo’i ‘ona āmana’ia pē taliaina Pālesitina ‘o se setete ma ‘ia tu’u atu ‘i ai lona tūlaga ‘o se sui ‘āto’atoa ‘o Mālō ‘Aufa’atasi pei ‘ona saunoa Clark.  Na saunoa Vaovasamānaia, ‘ua faia se fa’ai’uga ‘a le mālō lea ‘e iai le talitonuga, ‘o se tali ‘e mānana’o tagata Niu Sila ‘i le mālō ‘ina ‘ia fa’atinoina.  ‘E iai le aiā tatau ‘a ‘Isarā’elu ‘e puipui ai ‘i lātou.  Peita’i ‘e iai le taimi ‘e lē mafai ai ‘ona tausisia pea lea fa’afīnauga, pe ‘ā o’o ‘ina tele soifua ‘o tagata ‘e maumau ai ‘ona ‘o ia gāioiga ‘e puipui ai ‘i lātou.

Link to RNZ (Article) translated by Savelina Kasiano: https://www.rnz.co.nz/news/world/528491/un-security-council-s-credibility-at-stake-over-gaza-conflict-former-pm-helen-clark

ATA: Winston Peters / Samuel Rillstone – Helen Clark / AFP / Anadolu Agency (RNZ).