Pe moni pa’ū fa’apitoa ‘a supamāketi?

Na iloa ‘i se sā’ili’iliga fou ‘a le Consumer NZ, ‘e lē’o fa’apitoa ‘uma ‘a supamāketi ‘e moni ma ‘o ofo ia ‘e masani ‘ona tu’uina mai ‘i le ‘au fa’atau ‘e fa’apea ‘e maua ai ni taui tetele, ‘o lo’o ‘aumai ai ma ni tau maualuluga atu ‘o ‘oloa.  ‘E valu vāiaso na fa’agāsolo ai se sā’ili’iliga ‘a le Consumer NZ ‘i le faiga ‘o tau ‘o ‘oloa ‘a supamāketi ‘i Aukilani, Uēligitone ma Kalaiesetete.  Peita’i, na fa’aalia ‘e Belinda Castles, lē sa faia le sā’ili’iliga, ‘o taimi ‘e fa’alauiloa ai le pa’ū fa’apitoa ‘o le tau ‘o ni ‘oloa, ‘e lē fa’apea ‘o taimi ‘uma, ‘o ‘oloa nei, ‘o lo’o pito sili ‘ona pa’ū o lātou tau.  Mō se fa’ata’ita’iga, ‘i le supamāketi ‘a le Woolworths Lower Hutt, ‘e fa’afāina pe sili atu fo’i le tele ‘o taimi na iai fa’apitoa ‘i ni ‘oloa se 15 mai ‘oloa ‘e 22 sa o lātou tulituliloaina, ‘ae o le New World Hutt City, ‘e 13 ni ‘oloa ‘e māsani ‘ona pa’ū.  ‘I la lātou su’esu’ega, ‘e tūmau pea le pito maualalalo ‘o tau ‘a le Pak’nSave ‘i Lower Hutt ‘e ui ‘e la’itiiti ifo le aofa’iga ‘o a lātou fa’apitoa. 

‘I le New World Hutt City, ‘o le tau pa’ū fa’apitoa ‘o le fagu vailā’au fufulu ipu ‘a le Palmolive, ‘e $2.79 ‘ae ‘o le tau māsani ‘o lea ‘oloa ‘i le Pak’nSave, ‘e i le vā ‘o le $2.39 ma le $2.99 ‘e aunoa ma ni pa’ū fa’apitoa.  Sa pa’ū fa’apitoa ‘i le Woolworths mo le $2.50 mo le vāiaso ‘e tasi ma le $2.80 mō vāiaso ‘e tolu.  Na fa’aalia ‘e Bodo Lang ‘o se polōfesa ‘o iloiloga ‘i matā’upu tau ‘i fefa’ataua’iga, ‘o le tele tele ‘o le fa’aaogaga ‘o fa’alauiloaga ‘i pa’ū fa’apitoa, ‘ua ātili faigatā ai mō tagata fa’atau ‘ona iloa po’o le ā le tau māsani ‘o se ‘oloa ‘e tatau ‘ona iai.  Na fa’aalia ‘e le Consumer NZ ‘e tatau lava ‘ona matuā fa’amanino le faiga ‘e supamāketi ‘o tau ‘o a lātou ‘oloa.

Link to RNZ (Article) translated by Savelina Kasiano: https://www.rnz.co.nz/news/national/532952/how-special-are-supermarket-specials

ATA: RNZ/Bill McKay