Pe ā ma le to’a 42,000 na ‘āuai ‘i le Hīkoi

Na fa’atumulia le taulaga ‘i Uēligitone mai lava ‘i le vaveao ananafi, ‘i le silia ma le to’a 42,000 ‘o tagata ‘e lagolagoina le Hīkoi po’o le solo tele ‘a Māori mō te tiriti ‘a’o savavali āga’i atu ‘i le Palemene.  ‘E taunu’u le solo tele, ‘ua faitau afe tagata ‘o fa’atalitali mai lumāmaota ‘o le Palemene ‘a Niu Sila, ma le leo ‘o foafoa na iliina ‘e fa’afeiloa’i ai le solo, na ‘āuai ai ma le Tupu Tama’ita’i ‘a Māori, Nga wai hono i te po, fa’atasi ma Hone Harawira, Tuku Morgan ma le tama’ita’i faipule talavou ‘a le Vāega Fa’a’upufai ‘a Māori, lea na sasaeina le kopi ‘o le Pili tau fa’aofi ‘o le Treaty Principles Bill, Hana-Rāwhiti Maipi-Clarke. 

‘E silia ma le to’a 2000 tagata ‘āmata sāvavali mai le Hutt Valley ‘e tusa ‘o le 4 ‘i le vaveao ananafi ma sa fetaui ai ma le isi solo mai Porirua ‘i luga ‘o taligalu ‘o Uēligitone, ‘a’o le’i sāvavali fa’atasi ai ‘i le Palemene.  ‘O pepe, ‘o fānau iti, tupulaga talavou ‘e o’o lava ‘i tagata mātutua na ‘āuai ‘i le solo, ma a lātou fu’a ‘o le tino rangatiratanga ma fu’a ‘o le toitu te tiriti.  Na auaua’i sui ‘ese’ese na vala’aulia ‘e faia ai a lātou saunoaga ‘i le hikoi ‘i luma ‘o le palemene, ‘e aofia ai faipule Māori. 

Na fa’afeao ‘e leoleo le ta’ita’i ‘o le ACT, David Seymour ma lana vāega fa’a’upufai lea ‘e ana pili, ‘ina ‘ua savavali ane ‘i lumā maota ‘o le Palemene.  ‘O le taimi tonu lea na saunoa ai le isi ta’ita’i ‘o le Vāega Fa’a’upufai ‘a Māori, Rawiri Waititi, ‘i le solo, ma vala’au ai Waititi ‘i le aofia ‘ina ia ‘ālalaga ‘e ta’u atu se fe’au manino ‘i le ta’ita’i ‘o le ACT, ‘e fa’amuta le pili.  Pe na’o le lima minute na iai Seymour ‘ae toe liliu ma āga’i ‘i totonu ‘o le Maota. 

‘E iva aso ‘o fa’aauau le solo ‘i luga ‘o le ala, malaga mamao mai vāega ‘ese’ese ‘o le atunu’u mai lava ‘i le Far North ma Bluff, ‘o isi na sāvavali, ‘a’o nisi na malaga ‘i ta’avale, pe ti’eti’e ‘i solofanua, ‘a’o nisi fo’i na malaga mai ‘i va’alele mō le aso ananafi.  ‘Ina ‘ua māe’a saunoaga, ma fa’atinoga ‘uma na tutupu ‘i luma ‘o le Palemene ‘i le Hīkoi, na tutū ta’avale ‘a’o faia se haka tele ‘i le fetaula’iga ‘o ‘auala ‘o Bunny ma Featherston.  Pe ā ma le to’a 2000 tagata na toe fo’i ‘i le Waitangi Park mō se koneseti na faia ai ‘e taualuga ai le aso, ma fa’amāe’aina ‘i le itūlā ‘e fitu ‘i le afiafi. 

Link to RNZ (Article) translated by Savelina Kasiano: https://www.rnz.co.nz/news/te-manu-korihi/534238/what-s-good-for-maori-is-good-for-everyone-hikoi-ends-with-peaceful-protest

ATA: Sāmoa Capital Radio / Murray Faivalu (S21).