Pa’ū le tagata ‘i totonu ‘o le fola ‘o le fale, $5000 ‘ua fa’asalaina ai le Landlord

‘E $5000 tālā le tupe ‘ua fa’atonuina se Landlord ‘ia totogi atu ‘i se tagata na nofo mautotogi, ‘ina ‘ua pa’u ‘i totonu ‘o le fola ‘o le umukuka ‘o le fale. Na maua ‘e le fa’amasinoga mō fale, ‘e le’i faia ‘e le landlord ni gāluega fa’aleleia ‘i le fale nofo mautotogi, na māfua ai se fa’alavelave.

‘O le tagata nofo mautotogi ‘e to’afā na nonofo ‘i se fale ‘e lima potumoe, tolu faletā’ele ‘i Kohimarama ‘i ‘Aukilani iā Sētema 2021. Na lātou totogiina le $900 ‘i le vaiaso. Iā Nōvema 2022, na logoina ai ‘e ‘i lātou ‘i lē na va’aia le fale, ‘ua ‘amata ona āfāina le fola ‘o le fale ‘i le sūsū mai ‘i tīmuga, peita’i ‘e le’i faia iai se gāluega. ‘O le aso 1 ‘o Mē, 2023, na faʻafesoʻotaʻi ai ‘e le ‘au nofo mautotogi lē ‘e anaina le fale, ‘ua paʻū ‘i lalo isi tiles ‘o le umukuka, ma ‘ua faigata ai ‘ona tatala le faitoto’a ‘o le faletāmea.  Na toe logoina le landlord ‘i le aso 15 ‘o Mē, ‘ina ‘ua pa’ū sē tasi ‘o ‘i lātou ‘i totonu ‘o le fola ‘o le umukuka, ‘ona ‘o le pala ‘o le fola. Na tali le pule ‘o le fale ma fa’atūlaga se konekarate ‘e alu atu ‘e va’ava’ai ‘i mea na fa’aleagaina ‘i le aso 20 ‘o Mē.

‘E ui ‘i le tele ‘o talosaga ‘i mea ‘e fa’aleleia ‘o le fale, ‘e le’i iloga na faia ‘iai ni gāluega fa’aleleia. ‘Ae ‘i le aso 2 ‘o Iuni, na ‘auina atu ai ‘e ‘i lātou na nonofo ‘i le fale se tusi tālosaga, ‘ina ‘ia fa’atumuina le pū ma fa’aleleia ‘i totonu ‘o le 14 aso. ‘E tele vāega ‘e le’i fa’amalieina ai ‘i lātou, na i’u ai ina ‘ave le landlord ‘i le Tenancy Tribunal. ‘O le i’uga ‘o le fa’amasinoga na fa’atonuina ai ‘e totogi atu le $5000 ‘i tagata nofo mautotogi.  

Link to 1News (Article) translated by Anna Fa’asolo: https://www.1news.co.nz/2024/09/05/landlord-must-pay-5000-after-tenant-fell-through-dining-room-floor/

ATA: Sāmoa Capital Radio (file).