Pa’ū le Pasene tului ‘o tupe: ‘Ua iai tonu lava ‘i le ala sa’o’ – Luxon

‘Ua saunoa le Palemia Christopher Luxon fa’apea le Minisitā ‘o Tupe Nicola Willis, ‘o le pa’ū ‘o pasene tului ‘o tupe pei ‘ona fa’ailoa ‘i le Aso Lulu, ‘ua ta’u mai ai, ‘o lea ua sa’o lava le ala ‘ua iai Niu Sila.  Na fa’apa’ū ‘e le Faletupe Fa’aleoleo le OCR ‘i le 50 basis points, ma ‘ua iai nei ‘i le 4.25 pasene le tului ‘o tupe, ‘o se fuainūmera pito maualalo ‘ua fa’amauina ‘i lenei tausaga.  ‘O le ‘ā mafai ‘ona pa’ū ai pasene ‘o tupe nonō, ‘e aofia ai mōkesi mō tagata ‘e iai o lātou lava fale, fa’apea ai nonōgātupe mō pisinisi.

‘Ua telegese le alu ‘i luga ‘o le tau ‘o le soifuaga, peita’i, ‘o lo’o maualalo pea le tupu ma le ola ‘o le tamāo’āiga.  Na saunoa Luxon, ‘o le pa’ū ‘o le pasene tului ‘o tupe po’o le OCR, ‘o se tala fiafia lea mo ‘āiga ma pisinisi.  Na saunoa le Minisitā ‘o Tupe, ‘o la’asaga na uia ‘e le mālō ‘e fa’amuamua ai le fa’aeteete ‘o le mālō ‘i tupe fa’aalu, inivesi ‘i ‘au’aunaga ‘e fesāga’i ma tagata ma toe fa’afo’i le talitonuina ‘o le tamāo’āiga, ‘o mea ia ‘ua māfua ai ‘ona iai suiga.  Ma ‘ua sa’o le ‘auala lea ‘ua uia ‘e le mālō.  Na fa’aalia ‘i fa’amaumauga ‘a le Faletupe Fa’aleoleo, na pa’ū le aotelega ‘o le tamāo’āiga ‘o le atunu’u ‘i totonu ‘o māsina ‘e tolu ‘e o’o mai ‘iā Iuni peita’i ‘e fōliga mai na pa’ū fo’i ‘i totonu ‘o māsina ‘e tolu ‘e o’o mai ‘iā Sētema.

Link to RNZ (Article) translated by Savelina Kasiano: https://www.rnz.co.nz/news/political/535007/ocr-cut-we-are-on-the-right-path-luxon

ATA: RNZ