Pāsia le faitauga muamua ‘o le Pili ‘o le Treaty Principles Bill

Na ta’ita’iina le haka ‘o le “Ka Mate” ‘e le tama’ita’i ‘o Hana Rawhiti Maipi Clarke ‘o le sui faipule ‘o le Te Pāti Māori ma na fa’alavelave ai ‘i le taimi ‘o le pālota, ‘i le faitauga muamua ‘o le Pili ‘o le Treaty Principles Bill ‘i le Palemene ‘i le aso ananafi. Ua pāsiaina ‘i lona faitauga muamua le pili tau fa’aofi ‘a le ta’ita’i ‘o le ACT David Seymour, ma ‘o le mafua’aga ‘autū ‘o le Pili, ‘ina ‘ia fa’atūlaga mai ‘e le Palemene, po’o le ā le uiga ‘o matā’upu fa’avae ‘o le Feagaiga, fa’amanino ma fa’amausalī, ma fa’atalanoa le atunu’u, po’o le ā lona tūlaga ‘i le fa’avae ‘o le atunu’u. 

‘O le faipule ‘a le Leipa Willie Jackson le ulua’i faipule na fa’atūla’i ‘ese ‘e le fofoga fetalai mai le Maota Fono, ina ‘ua ia lafo ni fa’amatalaga ‘i le ta’ita’i ‘o le ACT David Seymour, ma vala’auina Seymour ‘i le pepelo, ma soli ai tūlāfono tūmau ‘o le maota. ‘O le faipule ‘a le Pāti ‘a Māori Hana-Rawhiti Maipi-Clarke, na tu’uina atu ‘i ai se fa’asalaga ‘e sili atu ona mamafa – fa’amālōlō mai le Palemene mō le isi 24 itūlā mai ‘i le aoauli ananafi,  ina ‘ua ia ta’ita’ia se haka na fa’alavelave ai ‘i le taimi ‘o le pālota ‘i le faitauga muamua ‘o le pili, ma sasae le pepa ‘o le pili,  na māfua ai ona tāofi ‘e le fofoga fetalai le fono mō le lata ‘i le ‘afa itūlā.

‘I le saunoaga ‘a Seymour na ia tā’ua ai, ‘o matā’upu fa’avae ‘o le Feagaiga ‘o lo’o iai nei, ‘o se fa’afītāuli ona ‘o le tu’uina sa’oloto atu lea ‘o āiā tatau mō tagata Māori.‘I lona talitonuga, ‘o le pili ‘o le Treaty Principles Bill, ‘e maua ai se avanoa mō tagata Niu Sila, ‘ae lē ‘o fale fa’amasino ma le Fa’amasinoga ‘o le Waitangi, ‘e fai ai ni o lātou finagalo po’o le ā le Feagaiga.  ‘Ae manatu lōia sīnia, ‘o le folasia ai ‘o lea pili po’o le tūlafono tau fa’aofi fa’atasi ai ma le fesili fa’apālota (referendum) ‘o lo’o fuafuaina, ‘o se ‘auala ‘ua matuā lē talafeagai lava lea ‘ua fa’aaogāina, ‘e tali ma lōtea ai se matā’upu telē tele ‘o le fa’avae ‘o le atunu’u.  Na fa’aalia ‘e lōia, ‘o matā’upu fa’avae (principles) ia ‘ua fuafua le pili ‘a le faigāmālō so’ofa’atasi ‘e toe sui ai le uiga ‘o le te Tiriti po’o le Feagaiga, ‘e lē’o atagia mai ai te Tiriti po’o le Feagaiga. 

‘O le asō ‘o lo’o āga’i atu ai le hikoi po’o le solo tete’e ‘a Māori mō le feagaiga ‘o le Waitangi mai Rotorua ‘i Hawkes Bay, ona fa’agāsolo lea, ‘e fa’amoemoe ‘e taunuu mai ‘i Uēligitone ‘i le vā ‘o le Aso 18 ma le Aso 19 ‘o Nōvema. ‘E tusa ma le 6000 tagata na ‘āuai ‘i solo tete’e ‘i Hamiltone, pei ona līpotia ‘e le leitiō Niu Sila. 

Link to RNZ (Article) translated by Anna Fa’asolo: https://www.rnz.co.nz/news/political/533795/watch-haka-interrupts-vote-for-the-treaty-principles-bill

ATA:  Samuel Rillstone/RNZ.