Pasia ‘e ‘avea ma tūlāfono le Pili ‘ua toe fa’afo’i ai sitiseni ‘o tagata Sāmoa mai le 1924-1948

’O le leo ‘o le agaga fiafia ma le fa’afetai ‘ina ‘ua saunoa le sui fofoga fetalai ‘o le Maota Fono ‘o le palemene a le mālō ‘o Niu Sila ‘e tu’u atu le lafo pe finagalo sui usufono ‘e fa’apāsia ‘e ‘avea ma tūlāfono le Pili taufa’aofi ‘i le Palemene ‘o Niu Sila, Citizenship Western Samoa Restoration Amendment Bill ‘ua toe fa’afo’i ai sitiseni ‘o tagata Sāmoa na fānanau ‘i le vā ‘o le 1924 ma le 1948, ‘i le māe’a ai ‘o le fa’aaliga ‘o finagalo ‘o faipule ‘i le Palemene.  ‘O faipule ‘uma ‘e to’a 12 ‘o le Palemene sa maua le avanoa ‘e fai ai a lātou saunoaga, sā fa’aleo lo lātou lagolagoina ‘o le tūlāfono taufa’aofi. 

Na ‘amata ‘i le saunoaga ‘a le afioga ‘i le faipule ‘iā Teanau Tuiono ‘o le Green, ‘o lē na folasiaina le pili ma sa ia fa’afetaia ai tagata ta’ito’atasi ma tagata ‘uma na gālulue fa’atasi ‘i le taumafaiga ‘o lenei pili.  ‘O ta’ita’i ‘o nisi ‘o vāega fa’a’upufai fa’atasi ma sui ‘o vāega fa’aupufai sa fai ma sui ‘e fa’aleo lo lātou lagolago ‘i le pili, ‘e aofia ai le ta’ita’i ‘o le Labour Chris Hipkins ma le isi ta’ita’i ‘o le Te Pati Māori, Ngarewa Packer.  Na tali atu ‘e ala ‘i le patipati le mamalu ‘o Sāmoa na potopoto ‘i le taumafaiga ‘a nisi ‘o faipule ‘e saunoa fa’a-Sāmoa ‘ina ‘ua fa’aali o lātou finagalo ‘i le pili.

‘O se aso ‘o le tala fa’asolopito  ma ‘o le aso ‘e fa’asa’o ai le sesē na faia talu mai le 40 ma ‘ona tupu ‘i tausaga ‘ua tuana’i pei ‘ona saunoa ai nisi ‘o faipule.  Na faia ai fo’i se fa’asilasilaga ‘a le matāgāluega ‘o ‘au’aunaga ‘a le mālō pei ‘ona saunoa ai le faipule ‘o le National Cameron Brewer ‘i le Palemene, ‘i le fuafuaga ‘o le ‘ā fa’atinoina ai le faiga ‘o le sitiseni, pe ‘ā fa’apea ‘e sainia ‘i le Aso Gafua le Pili, ‘o le ‘ā mafai loa ‘e tagata Sāmoa ‘e agava’a, ‘ona tu’uina atu a lātou talosaga mō le sitiseni Niu Sila ‘āmata atu ‘i le Aso Lua ‘o le vāiaso fou. 

‘O le Aso Faraile ‘e ‘āmata ai ‘ona fa’aola le ‘upegatafā’ilagi ‘e tu’uina atu ‘i ai talosaga ‘e tāpena ai mō lea fa’amoemoe.  ‘O le ‘umi ma le taimi fuafuaina ‘e fa’atali ai le talosaga, pe tusa ma le 30 aso faigāluega, ‘ae fua ‘i fa’amatalaga tu’uina atu mai sui talosaga, ‘o le ‘upegatafā’ilagi ‘e āga’i ‘i ai, ‘o le govtnz, ‘o le ‘ā maua ‘uma ai fa’amatalaga mō le faiga ‘o lea talosaga ‘o le sitiseni.  Mo Sāmoa ‘e mafai ‘ona tu’uina atu talosaga ‘i le ‘Ōfisa ‘o le Komesina Niu Sila ‘i Sāmoa, pe meli fo’i le talosaga ‘i le ‘Ōfisa ‘o le Internal Affairs a Niu Sila po’o le DIA.  Na fa’aalia fo’i ‘i le saunoaga a Brewer, ‘e mafai ‘ona toe fa’afo’i le tupe ‘a le tagata talosaga, pe ‘ā fai ‘e talia lana talosaga ma maua lona sitiseni.

Na saunoa le afioga ‘i le sui palemia Vaovasamanaia Winston Peters ‘ina ‘ua fesiligia ‘i sona finagalo ‘i le pili ma na tali, ‘ua fa’atino lava folafolaga ‘a lana vāega fa’a’upufai ‘e lagolagoina ai le pili. ‘Ua fa’aalia fo’i lona agaga fiafia ‘i lana vāega fa’a’upufai ma ia tā’ua fo’i le tāua ‘o le so’otaga ma tagata Sāmoa.  Na tulituliloa fo’i le faipule Teanau Tuiono ‘i lenei lava pili ma ia toe tā’ua ai le agaga ‘o le fa’afetai ma tagata ‘uma na lagolagoina lenei fa’amoemoe.  Sā le’i fa’agaloina fo’i se tasi na iloga lona fīnau ‘i lenei matā’upu, le afioga Anae Arthur Anae ma fesiligia ai fo’i ‘i sona tāofi mā’e le’o mea uma ia sa finagalo iai peita’i, ‘o se aso lenei e ao ona patipatia fa’atasi, ‘ae ‘o le ‘ā fīnau pea.

ATA: Sāmoa Capita Radio / (Murray Faivalu, Savelina Kasiano & Anna Fa’asolo).