O’o atu ‘i le 13 pasene tupe fa’aalu ‘i fa’atauga ‘o le Boxing Day ‘i Niu Sila

Tele ni tupe na maua ‘e le ‘au fai pisinisi ‘i le Aso ‘o le Boxing Day po’o le 26 Tēsema ‘i lenei tausaga, ‘ona ‘e $67.7 miliona pe 13 pasene na si’itia ai pe ‘ā fua ‘i le tausaga talu ai, ‘e tusa ai ma fa’amaumauga ‘a le Worldline.  ‘Ua fa’aalia le fiafia ‘o tagata ‘e fai a lātou fa’atauga ‘i le Boxing Day, ‘e tusa ai ma fa’amaumauga ‘o tupe fa’aalu, ‘e le’o aofia ai tupe mai gāluega tali mālō, taumafa ma ‘ava mālosi, pei ‘ona saunoa Bruce Proffit ‘o le Worldline. 

Sā pa’ū tupe fa’aalu ‘i le Boxing Day ‘i le 2023 ma le 2022 peita’i ‘ua mātauina le si’itia ‘i lenei tausaga, ‘aemaise lava ‘i faletusi, fale ‘ofu, fale’oloa ‘o mea ‘e fa’aaogā ‘i tā’aloga ma fale’oloa ‘e fa’atau ai mea faigāluega ‘e fa’aleleia ai fale.  Sā pito sili ‘ona tele fa’atauga ‘i Whanganui, 33 pasene na si’itia ai, Marlborough 31 pasene ma West Coast 29 pasene. 

Peita’i, ‘e lua pasene na itiiti ifo ai fa’atauga ‘a tagata Niu Sila ‘i fale’oloa, taumafa ma ‘ava mālosi ‘i totonu ‘o aso ‘e tolu ‘a’o lumana’i le aso ‘o le Kerisimasi, ‘e ui ‘o le Aso 24, ‘e pito sili ‘ona pisi ‘i fa’atauga ‘o le tausaga.

Link to RNZ (Article) translated by Savelina Kasiano: https://www.rnz.co.nz/news/business/537670/boxing-day-sales-spend-up-13-percent-in-nz

ATA: Sales were up at many places, including at Queensgate Mall in Lower Hutt. Photo: RNZ / Mary Argue