Ono tāpunia nisi ‘o fa’alāpotopotoga ‘o lo’o maua mai ai mea’ai mō tagata mātitiva ‘o ‘Aukilani

‘I ‘Aukilani, ‘ua fa’ailoa mai ‘e nisi ‘o fa’alāpotopotoga tetele ‘o lo’o maua mai ai mea’ai ma fesoasoani mō tagata puapuagātia ma lima vāivai, ‘e ono tāpunia po’o le fa’aitīitia fo’i ‘o ā lātou ‘au’aunaga, ‘ona ‘o se fuafuaga ‘a le Mālō ‘e fa’amuta vaegātupe ‘e lagolago ai ā lātou gāluega ‘e ‘āmata atu ‘i le tausaga fou.

‘O lenei lapata’iga ‘ua tu’uina mai, ‘i le vaitaimi ‘o lo’o feagai ai le to’atele ‘o tagata ma faigatā ‘i le sā’iliga ‘o mea ‘e maua ai mea’ai mō le fofoga taumafa, ‘i totonu ‘o se tausaga ‘ua maoa’e ai le maualuga ‘o tagata ‘ua lē faigāluega, ‘ona ‘o le fa’a’umi’umi ‘o tūlaga fa’alētonu ‘o le tamāo’āiga.

‘O le fa’alāpotopotoga ‘a le Auckland City Mission na maua sa lātou vaegātupe fa’apitoa mai le mālō, ‘e fa’aauau ai ‘ona faia ā lātou pusa mea’ai mō tagata puapuagātia, se’ia o’o ‘i le fa’ai’uga ‘o le tausaga nei, ‘ae lātou te lē ‘o mautinoa pē ‘o le ā le isi la’asaga ‘o le ‘ā o’o ‘i ai.

Na fa’ailoa mai ‘e le tinā ‘iā Helen Robinson, ‘e galue ai ‘i  le City Mission, ‘ua ‘uma ‘ona tu’uina atu sa lātou talosaga ‘i le faigāmālō so’ofa’atasi mō se vaegātupe fa’alētausaga ‘e faia ai ni pusa mea’ai se 50,000 mō tagata lima vāivai ‘i le tausaga fou 2025, peita’i ‘ua fa’ailoga fesili pe talia lea talosaga pē lēai ‘i le taimi nei.

Na ia tā’ua le fa’apopoleina ‘o le ‘ā tou fa’alāpotopotoga, ‘ona ‘o le fā afe ‘o tagata ‘e fa’alagolago atu mō le tausiga māsani ‘o le soifuaga.  ‘O le isi fa’alāpotopotoga ‘e igoa ‘o le Buttabean Motivation Foodbank, lea ‘e fa’alagolago ‘i ai le tusa ma le 200 ‘āiga ‘Aukilani mō le tausiga ‘i le vāiaso, na maua sā lātou tupe ‘e lata ‘i le $200,000 afe Tālā, ‘ina ‘ua fa’alaua’itele mai sa lātou talosaga mō se fesoasoani, ‘ina ‘ua le ‘au’au le fa’asoa ‘ona ‘o le mana’omia tele ‘o la lātou fo’i ‘au’aunaga.

‘Ae ‘i le North Shore, na maua foi ‘e le Fa’alāpotopotoga ‘o le Good Works Trust, se vaegātupe mai fōa’i ‘a tagata, ‘e fa’atino ai la lātou polokalame ‘o mea’ai mō tamaiti ā’oga, se’ia o’o ‘i le kuata lua ‘o le tausaga fou.   ‘O lenei fa’alāpotopotoga ‘e maua mai ai fo’i mea’ai ma fesoasoani mō ‘āiga lima vāivai ‘i lea vāega ‘o ‘Aukilani.

‘O fa’alāpotopotoga ‘uma nei, ‘ua o lātou talosagaina le faigāmālō, ‘ina ‘ia fa’aauau ‘ona iai sēleni mō ‘au’aunaga nei ‘e fesoasoani ma lagolago ai ‘i mana’oga ‘o le to’atele ‘o tagata ‘ua feagai nei ma mafatiaga ‘ona ‘o le lēai ‘o ni gāluega ma le fa’alētonu ‘o tūlaga tau le tamāo’āiga ‘o le atunu’u.  Sā fa’ailoa mai lā ‘e le Matāgāluega ‘o le Ātīna’e Lautele, le MSD, ‘o fa’alāpotopotoga tūma’oti nei, na ‘āmata mai ‘i le tausaga ‘e 2020, ‘ona tu’uina atu ‘i ai fesoasoani tu’usa’o ‘a le mālō, ‘i le vāitaimi ‘o le vevela ‘o le fa’ama’i kōviti, mā ‘e o’o mai ‘i le taimi nei, ‘ua sili atu ‘i le $200-miliona Tālā ‘ua fa’amatu’uina atu ‘i ai ‘e le Mālō ‘o Niu Sila mō ā lātou ‘au’aunaga ma gāluega fai.

Link to RNZ (Article) translated by Lauano Ilaoa: https://www.rnz.co.nz/news/national/536762/auckland-foodbanks-face-closure-reducing-services-as-funding-to-stop

ATA: Auckland City Missioner Helen Robinson. RNZ / Marika Khabazi