Ono o’o atu ‘i le 70 pasene le tau ‘o pāsese ‘o pasi ma nofoāafi ‘ina ‘ia fa’amalieina matāti’a ‘a le NZTA

‘O le ‘ā si’itia tau ‘o pāsese ‘i pasi ma nofoāafi ‘i le atunu’u, ma ‘ua fa’ailoa atu ‘e le Lālā ‘o fela’ua’iga ‘i pūlēgānu’u, ‘ina ‘ia tu’u ‘i luga le aofa’iga ‘o tupe maua ‘e tatau ‘ona maua pe ‘ausia. 

Na lafoina atu ‘e le Waka Kotahi NZTA ‘i pūlēgānu’u ma pūlega ‘o fela’ua’iga ni tusi, ‘o lo’o ta’u atu ‘i ai, ‘ina ‘ia si’itia a lātou siea, po’o vāega tupe ‘e ao ‘ona lātou totogiina mai le tau ‘ātoa ‘o fela’ua’iga lautele mai isi mea, ‘e lē aofia ai lāfoga po’o rates, po’o vaegā tupe mai le mālō.  Na fa’aalia ‘e le ta’ita’ifono ‘o le Fa’amalumaluga ‘o Pūlēgānu’u Fa’aitūmālō ‘a Uēligitone mō le itū tau ‘i fela’ua’iga, ‘ā fai ‘e mo’omia le ‘ausia ‘o fa’amoemoega ia ‘ua fa’atūlagaina mō le Fa’amalumaluga ‘o Pūlēgānu’u ‘a Uēligitone, ‘e tatau ‘ona si’itia le tau ‘o pāsese ‘i le 71 pasene ‘i le tausaga ‘ā sau, peita’i, ‘ua matuā tu’u fa’afeagai lava ma mo’omiaga ‘o tagata ‘i le taugatā ‘o le tau ‘o le soifuaga.

‘A fa’amatalaina ātili, ‘ā fai ‘e $10 ‘e fa’aalu ‘e le tagata Uēligitone ‘i pāsese ‘a le Metlink ‘i le aso, ‘o lona uiga, ‘o le ‘ā ia fa’aaluina le $17 ‘i le aso, ‘i lalo ‘o tau ‘o pāsese fou.  ‘O tausaga ‘e lua ‘ua tuana’i, ‘e 6 pasene na si’itia ai pāsese ‘i Uēligitone toe si’itia ‘i le 10 pasene ‘ina ‘ia tau fa’afetaui ma le si’itia ‘o le tau ‘o le soifuaga.  Na saunoa Thomas Nash, ‘ua lātou manino ‘i le toe fo’i ‘o tagata ‘e fa’aaogā ta’avale pe ‘ā taugatā pāsese ‘i feoa’iga lautele, to’atele tagata, ‘ae ‘o le ‘ā ātili fa’aleagaina ai le si’osi’omaga ma lē saogalēmū ‘auala tetele. 

Link to RNZ (Article) translated by Savelina Kasiano: https://www.rnz.co.nz/news/national/534941/bus-and-train-fares-may-surge-by-up-to-70-percent-to-meet-nzta-targets

ATA: RNZ / Richard Tindiller.