Ono maualuga le aofa’iga ‘o tagata ‘e māliliu ‘i le fulū ‘i lenei tausaga

‘Ua tu’uina mai se lapata’iga ‘e uiga ‘i le ono maoa’e ‘o le aofa’iga ‘o tagata ‘e māliliu ‘i le tausaga lenei, ‘ona ‘o le ma’i ‘o le fulū ‘i totonu ‘o Niu Sila.

Na fa’aalia mai ‘e le ali’i fōma’i fa’apitoa mō gasegase pipisi, ‘o Michael Baker, ‘o fa’amaumauga ‘ua iai ‘i le taimi nei, ‘e aofia ai ma le fuainūmera ‘o tagata ‘ua taofia ‘i falema’i mō togafitiga, ‘e atagia ai, le ono o’o atu ‘i se tūlaga maoa’e, le aofa’iga ‘o tagata ‘e ono māliliu ai ‘i le fulū ‘i le tausaga nei.

Peita’i, ‘e fa’ato’ā mautinoa lea tūlaga ‘i le fa’ai’uga ‘o le tausaga.

‘Ae ‘o le fua ‘evalesi lava ia ‘o tagata ‘e fano ai le soifua ‘i le ma’i ‘o le fulū ‘i totonu ‘o Niu Sila, ‘i le tausaga ‘e tasi, ‘e tusa lea ma le 500.

Na tā’ua fo’i ‘e le ali’i fōma’i ‘e māsani ‘ona tele māfua’aga ‘e ‘uma ai le ola ‘o se tagata ‘o se fa’ata’ita’iga, ‘e mafai ‘ona maliu se tasi ‘ona ‘o le gasegase ‘o le fatu, ‘ae na māfua le fa’alētonu ‘o le fatu, ‘ona ‘o a’afiaga ‘o le ma’i ‘o le fulū.

‘Ua iloa fo’i ‘i fa’amaumauga ‘i le taimi nei, le mālosi ‘o le pepesi ‘o le fulū, ‘i le aofa’iga ‘o vala’au mō se fesoasoani ‘i ‘au’aunaga lāvea’i, ‘ātoa ma le aofa’iga ‘o tagata ‘ua va’aia ma taofia ai ‘i falema’i mō togafitiga ‘o se tūlaga ‘ua ‘umi se taimi ‘o mātauina pea.

‘O ‘Aukilani lava ia ‘ua fa’amauina ai se aofa’iga ‘aupito ‘i maualuga ‘i totonu ‘o le sefulu tausaga ‘ua mavae atu nei.

Peita’i, ‘o le lua vaiaso na tuana’i atu nei, sā mātauina ai le ‘āmata ‘ona pa’ū ‘i lalo le aofa’iga ‘o tagata ‘e taofia ai ‘i falema’i ‘ona ‘o le fulū.

Link to RNZ (Article): https://www.rnz.co.nz/news/health/1360596/warning-deaths-from-flu-could-reach-historical-high

IMAGE/ATA: Epidemiologist Michael Baker. Supplied / Department of Public Health