Ono fa’amausali le fa’aitīitia ‘o turisi ‘ona ‘o le si’itia ‘o tau ‘o visa

‘O le aso muamua ‘o Oketopa ‘e fa’amamaluina ai tau fou ‘o visa Niu Sila.  ‘Ae ‘ua fa’aalia ‘e sui ‘o le Komiti mō Kamupani va’alele, ‘e ono toe āfāina taumafaiga ‘e toe fa’alelei ai ‘au’aunaga ‘a Niu Sila mō tagata tāfafao mai fafo ‘ona ‘o le si’itia ‘o tau fou ‘o visa. 

Na faitioina ‘e le Komiti ‘o kamupanī va’alele le Matāgāluega ‘o Pisinisi, Fa’afotuga ‘o Ma’ema’e fou ma Gāluega, ‘ona ‘o le lē fa’atalanoaina ‘o kamupanī va’alele, lea ‘o lo’o ‘ūmiaina fa’amaumauga tāua ‘o ‘au’aunaga mō tagata tāfafao mai fafo.  ‘O le si’itaga ‘o tau ‘o visa, ‘o se gāioiga ‘e maua ai le silia ma le $563 miliona ‘i le isi 4 tausaga pei ‘ona saunoa le Minisitā ‘o le ‘Ōfisa ‘o Femālagaā’iga Erica Stanford.  ‘O le visa asiasi ‘o le ‘ā si’itia mai le $211 ‘i le $341, ‘ae ‘o le polokalame ‘e tāfafao mai ai ma faigāluega, ‘o le ‘ā si’itia mai le $420 ‘i le $670.  ‘I pepa ‘o fa’amaumauga fa’alemālō, ‘o lo’o tā’ua ai, ‘o le māsina ‘o Mati, na feiloa’i ai le MBIE ma ni ‘au fai siea tetele, ‘e fa’atalanoa le si’iga ‘o tau ‘o visa ‘uma.  Peita’i na tā’ua ‘e le fa’atonu sili ‘o le Komiti ‘a sui ‘o kamupani va’alele, Cath O’Brien, na faia fa’alilolilo fa’atalanoaga, ma ‘e le’i aofia ai se finagalo mai kamupani va’alele.  ‘O lo’o iai ‘iā ‘i lātou fa’amaumauga ‘o le nūmera ‘o tagata ‘o lo’o ōmai ‘i le atunu’u, ma ‘e mafai ‘ona lātou tu’uina atu se ata ‘o le tūlaga ‘o le ‘ā tupu ma ona a’afiaga pe ‘ā tasi’i tau ‘o visa peita’i ‘e le’i aofia ‘i lātou ‘i fa’atalanoaga.  Na fa’aalia ‘i fa’amaumauga, ‘e na’o le 2 pasene na fa’aopoopoina ai le nūmera ‘o ‘au’aunaga ‘a va’alele sa fuafuaina mō le taumāfanafana 2024 pe ‘ā fua ‘i le taumāfanafana ‘o le 2023. 

Link to RNZ (Article) translated by Savelina Kasiano: https://www.rnz.co.nz/news/business/525081/visa-fee-increases-could-cement-tourism-decline-airline-industry

ATA: RNZ.