Ono a’afia tele Māori pe ‘ā fa’a’au’upegaina leoleo ‘i Niu Sila

‘O lo’o fa’amoemoe le Komesina fou ‘o Leoleo Richard Chambers, ‘e lē tatau lava ona fa’a’au’upegaina leoleo ‘i Niu Sila, peita’i ‘o lo’o tatala lava le avanoa mō talanoaga ‘i lea matā’upu. Fa’aalia ‘e le ‘Asosi ‘o Leoleo, ‘o le toʻatele ‘o leoleo ‘e mananaʻo ‘e tau’ave fana ‘i soʻo se taimi ‘e fa’atino ai gāluega ‘e fetāia’i ai ma fa’afītāuli, peitaʻi, na fautuaina ‘e le ‘au fai tōfā, ‘a o’o ‘i lea tūlāga, lona uiga ‘o le ‘ā toe fo’i ‘i tua le ‘au’aunaga ‘a leoleo, ma ‘e ono āfāina tele ai tupulaga talavou Māori. Na tā‘ua ‘e le sui peresetene ‘o le ‘Asosi ‘a leoleo, Steve Watt, ‘ua tele tausaga ‘o ūna‘ia lea matā’upu, ina ‘ia fa’a’au’upegaina leoleo ‘i Niu SIla.

‘I suʻesuʻega na faia ‘i le 2023, ‘e 68% ‘o leoleo na lagolagoina le matā’upu ‘e fa’a’au’upegaina ai le ‘aufaigāluega, ma ‘o se matā’upu ‘o le ‘ā lātou taumafai ‘e fa’atalanoa ma le komesina fou. Na tāʻua ‘e Chambers ‘i le leitiō Niu Sila ‘i le tāeao ananafi, ‘o lo’o tatala lona ‘ōfisa ma tāpena ‘e fa’alogo ma fa’asoa ‘i lea matā’upu. ’O lo’u lagona mitamita lea ‘e iai nei, ‘o Niu Sila ‘o se atunu’u sa’oloto ma e lagona le mitamita ‘i malu ‘o le mālō ‘e fa’atino ō lātou tiute, ma ‘ou te mana’o ‘e tūmau pea lona mamalu ‘o lo’o iai nei, pei ona saunoa Chambers. Sā ia fa’ailoa, ‘o lo’o mālamalama ‘i le tele ‘o lu’itau ‘o feagai ma leoleo. ‘Ae na tā‘ua ‘e le sui so’o’upu ‘o le People Against Prisons Aotearoa, le faiā’oga ‘o matā’upu tau solitūlāfono ‘i le Iunivesitē ‘o ‘Aukilani, Dr Emmy Rākete, ‘ua fa’aitiitia le nūmera ‘o leoleo ‘e māliliu ‘i fa’alavelave tau fana,’ae ‘o le nūmera ‘o tagata na fanaina ‘e leoleo ‘i Niu Sila, ‘ua si’itia ‘i tausaga ta’itasi. Saunoa Rākete, ‘o le fa’aaogāaga ‘e leoleo ‘o fana fa’auila po’o tasers, ‘o se mālamalama’aga lea ‘i ni tūlāga ‘e ono tutupu pe ‘ā ulufale ma osofa’i ‘i fana. ‘O lo’o lelei fo’i le fa’aaogāaga ‘o tasers ‘e fō’ia ai fete’ena’iga. ’Āfai ‘e sulu le fana ‘i ō lātou suilapalapa ‘o le ‘ā faigōfie ona lātou fa’aaogāina ma māliliu ai tagata, ‘aemaise ‘i ali’i talavou Māori.

‘O le līpoti talu ai nei ‘a le Understanding Police Delivery na fa’aalia ai ‘o le fa’ailoga tagata ‘i Māori, ‘o lo’o ‘avea pea ma popōlega tele ‘i le tele ‘o vāega ‘o ‘au’aunaga ‘a leoleo. ‘O le ‘ā to’atele ‘i lātou ‘e tete’e pe ‘āfai ‘e ūna’ia ‘e le mālō, le fa’a’au’upegaina ‘o leoleo, pei ona saunoa Rākete.

Link to RNZ (Article) translated by Anna Fa’asolo: https://www.rnz.co.nz/news/national/534470/fears-maori-will-pay-heaviest-price-if-police-carry-guns

ATA: Cole Eastham-Farrelly/RNZ