Ofo le Lōia Sili ‘i le āmioga ‘a se fa’amasino na ‘upuleagaina Vaovasamanaia Winston Peters

Na matuā ofo le Lōia Sili Judith Collins, ‘i le āmioga ‘a se fa’amasino ‘o fa’amasinoga fa’aitūmālō ma lana pā’aga, na ‘upuleaga ‘iā Vaovasamanaia Winston Peters ma isi faipule ‘o le NZ First ‘i se fa’atasiga na faia ‘i le Northern Club ‘i ‘Aukilani ‘i le māsina talu ai.  Na līpotia ‘e le Post, sā iai le fa’amasino, Ema Aitken ma lana pā’aga, David Galler, ‘i se pātī mō fa’amasino fa’aitūmālō ‘i le kalapu, ‘ae na ulufale ‘e le’i vala’auliaina, ‘i se fa’atasiga na iai le sui palemia, Vaovasamanaia. 

Na līpotia ‘e le Post, ‘e fa’apea, na taumafai fa’amasino Aitken ‘e ulufale ‘i le potu ‘a’o faia se saunoaga ‘a Vaovasamanaia, ma sā ia vala’au atu ‘e fa’apea ‘e pepelo Vaovasamanaia, ‘ae pē fa’apēfea fo’i ‘ona lātou fa’atagaina ‘e saunoa fa’apea.  Na tu’ua’ia le pā’aga ‘a le fa’amasino ‘i lona polokaina ‘o le ‘auala ‘e ui atu ai ‘i fafo Vaovasamanaia ‘a’o ‘ia tu’ua le fa’atasiga ma lafo fo’i ‘i ai ni ‘upu lē talafeagai. 

Na tē’enaina ‘e Galler tu’ua’iga ‘o lona polokaina ‘o le sui palemia fa’apea ai ma ‘upu na lafo.  ‘Ae sa ia ta’utino, ‘e lē talafeagai le faia po’o le lafo ‘o ni fa’amatalaga ‘i lea fa’atasiga.  Na tu’ua’ia fo’i ‘i lona lafoina ‘o ni fa’a’upuga ‘iā Casey Costello fa’apea ma le failautusi ‘o le Pātī.  Na saunoa le Lōia Sili, ‘ua ‘uma ‘ona talanoa ‘i le Fa’amasino Sili ma ta’u ‘i ai le matuā lē taliaina ‘o lea itū’āiga ‘o amioga mā ‘e tatau ‘ona faia ‘i ai se gāioiga.

Link to RNZ (Article) translated by Savelina Kasiano: https://www.rnz.co.nz/news/political/537050/attorney-general-appalled-after-judge-and-former-doctor-verbally-abuse-winston-peters-at-exclusive-party

ATA: Samuel Rillstone / RNZ.