‘O tātou mo’omia lava tīnoitupe?

‘O le ‘ā fa’atonuina ‘e ‘Ausetālia nisi ‘o fale’oloa ‘e fa’atauina atu nisi ‘o ‘oloa pito mo’omia, ‘ina ‘ia talia tīnoitupe ‘āmata atu ‘i le aso 1 Ianuari 2026.  ‘Ae ono faia fo’i ‘e le Faletupe Fa’aleoleo se pōlisi ‘e tali atu ai ‘i le puipuiga ‘o tīnoitupe (cash) ‘i totonu ‘o Niu Sila.  ‘O le ‘ā folasia ‘e ‘Ausetālia se pōlisi ‘e alagātatau ai ‘i pisinisi ‘e fa’atauina atu ‘oloa ‘e pei ‘o fuāla’au mō togafitiga fa’apea ma penisini, ‘ona talia tīnoitupe.  ‘O le ‘ā ‘āmata fo’i ona lē toe fa’aaogāina siaki tupe.  ‘Ua vave ‘ona pa’ū le fa’aaogaga ‘o tīnoitupe ‘i ‘Ausetālia, mā ‘i le 2007, ‘o le 69 pasene ‘o fefa’auia’iga ‘o tupe (transactions), sa fa’aaogāina ai tīnoitupe peita’i ‘i le 2022 ‘e na’o le 13 pasene.  ‘E tali tutusa lava ma Niu Sila. 

Na fa’aalia ‘e se tasi ‘o le pūlega ‘o le Faletupe Fa’aleoleo, Robbie Taylor, pe tusa ma le 7 pasene ‘o tagata, ‘o lo’o fa’aaogāina lava le tīnoitupe ‘i aso ‘uma ‘e totogi ai mea ‘uma lava lātou te mo’omiaina.  Na tā’ua ‘e Taylor, ‘e tatau ‘i fale’oloa ‘i Niu Sila, ‘ona fa’ailoa ‘i tagata pe ‘ā fai lātou te lē taliaina tīnoitupe, ‘a’o le’i ‘āmata fa’atauga ‘a tagata.  ‘O lo’o fa’aauau pea ‘ona māta’itū ‘e le Faletupe Fa’aleoleo le talia ‘e fale’oloa ‘o tīnoitupe, ma va’ava’ai pe mo’omia le faia ‘o se pōlisi.  ‘Ua fa’apopoleina lava ‘i lātou ‘i le fa’aitiitia ‘o tīnoitupe, ‘aemaise lava ‘i nu’u ‘i tua ‘o Niu Sila.  ‘Ua lātou iloa le tāua tele ‘o le tīnoitupe (cash) ‘i taimi ‘e tutupu ai ni fa’alavelave ogaoga fa’alenātura ‘e pei ‘o le afā ‘o Kapelielu, ‘ina ‘ua lē ola masini tala tupe ma Eftpos ‘ona ‘o le motusia ‘o le ‘eletise.

Link to RNZ (Article) translated by Savelina Kasiano: https://www.rnz.co.nz/news/business/534530/do-we-still-need-cash

ATA: Sāmoa Capital Radio (file).