‘O se gagana ‘e fa’avavau – Fa’ailogaina le 52 tausaga ‘o le Vāiaso ‘o le Gagana Māori

‘O le 52 lenei ‘o tausaga talu mai le aso 14 Setema 1972, na savalia ai ‘e Hana Te Hemara ma nisi mai le Ngā Tamatoa, ‘o le Te Reo Māori Society ma tamaiti ā’oga mai le Te Huing Tauira ‘i le palemene ma tu’u se ‘atopa’u ‘i luga ‘o sitepu ‘o le palemene.  ‘O totonu ‘o lea ‘atopa’u, na iai ni saini se 30,000, na fa’aigoaina ‘o le Petihana Reo Māori, po’o le talosaga sainia mō le Gagana Māori. 

‘E ui sā ta’ita’ia se faigāmālō ‘a le National ‘i lea taimi, ‘ae sā le’i mamao le faigāpālota tele ma sā tau’a’aoina atu ai le talosaga sainia ‘i le faipule ‘o Matiu Rata, lea na ‘avea mulimuli ane ma Minisitā ‘o Matā’upu mō Māori ‘i le faigāmālō ‘a le Labour na ta’ita’i ai Norman Kirk.  Na ‘āmata ai ‘ona fa’aofi atu le a’oa’oga ‘o le Gagana Māori ‘i ā’oga fa’apea ma le a’oa’oga mō faiā’oga ‘i le gagana.  Na fa’asolosolo mai ai lava ‘i le tele ‘o tausaga ‘ona ‘avea ma suiga tele le ofi atu ‘o le Gagana Māori ‘i le soifuaga ‘o le atunu’u ‘o Aotearoa Niu Sila fa’apea fo’i ma lana aganu’u ma ‘avea ai ‘o se gagana āloa’ia ‘i le 1987. 

‘O le vaiaso lenei ‘ua fa’ailogaina ai le Te Wiki o te reo Māori, le vāiaso ‘o le Gagana Māori ‘ua fa’a’autūina ‘o le “Ake Ake Ake – A Forever Language“

Link to RNZ (Article) translated by Savelina Kasiano: https://www.rnz.co.nz/news/national/528176/a-forever-language-te-wiki-o-te-reo-maori-marks-52-years-of-extraordinary-progress

ATA: Supplied / Te Taura Whiri i te Reo Māori.