‘O māfua’aga nei ‘e lē tatau ai ‘i se ‘landlord’, ‘ona fesili pe iai sau gāluega

‘Ua toe fa’afou ‘e le Komesina mō le malu puipuia ‘o tūlaga patino ‘o le ta’ito’atasi, a lātou ta’iala mō fale mautotogi.

‘Āfai ‘o sa’ili se fale nofo mautotogi ‘i lenei tausaga, ‘ia manatua, ‘e lē mafai ‘e le tagata ‘e ona le fale nofo mautotogi (landlord) ‘ona fesiligia le tagata ‘e uiga ‘i lana gāluega, ‘o le fa’aaluga ‘o ana tupe, ‘o manatu ‘e uiga ‘i mataupu ‘i ‘upu fai ‘o mālō, ‘o a lātou lotu, po’o itū’āiga tagātānu’u. 

‘E māsani ‘ona feagai tagata ma le tele ‘o fa’afītāuli ‘aemaise lava ‘o tamaiti ā’oga ‘i le fia vave maua ‘o ni fale nofo mautotogi, ma misi ai vāega tāua ‘e uiga ‘i o lātou fa’amaumauga patino pei ‘ona fa’aalia ‘e le komesina, Michael Webster.  ‘O le popole tele fo’i ‘o tagata ‘i le fia maua ‘o se fale, ‘e fa’ailoa ai lava ma o lātou fa’amaumauga patino, ‘ae lē ‘o se tūlaga mo’omia ‘e tusa ai ma le tūlafono. 

‘O ta’iala fou ‘o lo’o tā’ua ai, ‘o tagata ‘e fia talosaga mō se fale nofo mautotogi, ‘e lē tatau ‘ona fesiligia ‘i fa’amatalaga ‘o a lātou gāluega ma isi vāega pei ‘ona tā’ua. ‘E lē tatau fo’i ‘ona fesiligiaina ‘i lātou ‘e uiga ‘i o lātou mana’oga fa’apitoa po’o ni gasegase po’o tuātusi ‘i ‘upega ‘o feso’ota’iga po’o le social media pei ‘ona tā’ua ai ‘i līpoti ‘a le Radio NZ.

Link to RNZ (Article) translated by Savelina Kasiano: https://www.rnz.co.nz/news/business/541665/flat-hunting-here-s-why-a-landlord-can-t-ask-whether-you-have-got-a-job

ATA: SCR (file).