‘O le to’atele ‘o ‘aveta’avale ‘e lē mulimuli ‘i tūlāfono ‘o ‘auala-su’esu’ega ‘a le AA

Na fa’aalia ‘i le sā’ili’iliga ‘a le AA, ‘o le to’atele ‘o ‘aveta’avale, ‘e lē ‘ausia le silia ma le 70 pasene ‘o le su’ega mō ta’iala fa’avae mō luga ‘o ‘auala tetele. 

‘E to’a 535 ‘aveta’avale ‘e iai laisene na fesiligia ‘i se sā’ili’iliga, ma nā māua ai fo’i, ‘e tutusa lelei maka na maua ‘e tagata ‘ua silia ma le 40 tausaga ‘o ‘aveta’avale, ma tagata ‘ua ‘ātoa le tausaga talu ‘ona maua laisene. 

Na saunoa Dylan Thomsen ‘o lē ‘e faia sā’ili’iliga ‘a le AA ma lē ‘e pūleaina le itū tau ‘i le saogalēmū ‘i luga ‘o ‘auala tetele, ‘e fai lava si atugalu tele, ‘ona ‘e lēai ma se ‘aveta’avale ‘e to’atasi, na sa’o ‘uma fesili ‘e 24 ‘o le su’ega.

‘E tatau ‘ona ‘ausia le 90 pasene ‘o le pasi mō le su’ega tusitusi (theory test) ‘o se laisene mō le laisene a’oa’o.  Na saunoa Thomsen, ‘e lē to’atele na mafai ‘ona ‘ausia lea maka, mai le to’a 535 na fesiligiaina, ma ‘e iai lona manatu, ‘o se mea ‘ua matuā mo’omia ‘ona fa’aleleia. 

‘E lagona fo’i le fa’anoanoa ‘ona ‘e na’o le 60 pasene lātou te iloa tūlāfono ‘i le gāioiga ‘e tatau ‘ona fai pe ‘ā taumafai ‘e pāsia se tagata vili uila.  ‘O nisi fo’i ‘o fa’afītāuli pito tetele, ‘o roundabouts, ‘ona ‘o le to’atele ‘o ‘aveta’avale ‘e lē iloa po’o le ā tonu le taimi sa’o ‘e tatau ai ‘ona fa’a’emo le mōlī fa’ailo, ‘a’o isi, ‘e lēai lava ma se fa’ailo ‘e fa’a’emoina.

‘O le fa’amatalaga ‘a Thomsen pei ‘ona talanoa ai ‘i luga ‘o le Leitiō Niu Sila, ‘o le mana’oga ‘o le AA, ‘e tatau ‘i le mālō ‘ona fa’aaogā le avanoa lea ‘e toe fa’afou ai laisene, ‘e toe fa’afou ai fo’i ma tomai ‘o ‘aveta’avale mō le fa’afoega ‘o le ta’avale.  ‘E tusa ma le 380,000 laisene ‘e fa’afou ‘i le tausaga, ‘ā fa’apa’ū le $20 mai le tau ‘e fa’afou ai le laisene, pe i lalo ifo ‘o le $8 miliona le tupe aofa’i, ‘ae ‘o fa’atōsina ia ‘e ‘augōfie ai tagata ‘e toe fa’afou o lātou tōmai ‘i le ‘avega ‘o le ta’avale.

Link to RNZ (Article): https://www.rnz.co.nz/news/community/884421/most-drivers-not-following-basic-road-rules-aa-research-shows

IMAGE/ATA: SCR (file).