‘O le sesē fa’aletagata le māfua’aga na pa’ulia ma goto ifo ai le HMNZS Manawanui ‘i gātaifale ‘o Sāmoa

‘Ua fa’alauiloa fa’alaua’itele mai ‘e le Minisitā ‘o le Puipuiga ‘a Niu Sila Hon. Judith Collins, fa’apea Navy Rear Admiral Garin Golding nisi ‘o fa’amaumauga ‘o le ulua’i līpoti ‘e uiga ‘i le va’a ‘a Niu Sila le HMNZS Manawanui lea na pa’ulia ma goto ifo ‘i gātaifale ‘o Tafitoala ‘i le Aso 05 ‘o ‘Oketopa 2024, ‘a’o fa’atautaia ai ni gāluega su’esu’e ‘i gātaifale ‘o Sāmoa.

Na saunoa Navy Rear Admiral Garin Golding, “‘O le sesē fa’aletagata (human-error) le māfua’aga na pa’ulia ma goto ifo ai le HMNZS Manawanui.”

‘Ua fa’amāonia mai nei, ‘e le’i tapēina, pe fa’amavaeina ‘e le ‘auva’a le kī ‘ua fa’aigoaina ‘o le auto-pilot (‘o le kī ‘e mafai ai ‘e le va’a ona fa’afoe lava ‘e ia le malaga ‘e aunoa ma se tagata) ‘i le taimi na tatau ‘ona tapē ai.

Na saunoa Golding, “E lēʻi iloa ‘e le ‘auva’a ‘o loʻo tūmau pea ‘i le auto-pilot le va’a, mā na sesē ‘uma mafua’aga na mafaufau iai le ‘auva’a, ‘o le mafua’aga na  lē mafai ‘ona tali mai ai le va’a ‘i sūiga ‘o le itū na taumafai ‘e mimilo ai le va’a.”

Fai mai fo’i Golding, ‘ē le’i mulimulita’ia ‘e le ‘auva’a “faiga masani” (procedures) sā tatau ‘ona fa’aosofia ai ‘i lātou e siaki ‘uma kī.

‘O lenei ripoti, ‘ua na’o se ata muamua ‘e tusa ma ulua’i su’esu’ega fa’a-fa’amasinoga (court inquiry), lea ‘ua faamoemoe ‘e māe‘a ‘i le kuata muamua ‘o le tausaga fou.

ATA: RNZ / Marika Khabazi & HMNZS Manawanui (Pic) Supplied.