‘O le Pili ‘e fa’ataga ai ‘ava mālosi ‘i fale teu ulu, ‘ua fa’ate’ia ai ‘ia pisinisi

‘Ua fa’ate’ia pisinisi ma ‘au’aunaga ‘o fale ‘oti ulu ma fale teu ulu, ‘i se pili po’o se tūlāfono fou taufa’aofi ‘e mafai ai ‘ona ‘ave ‘i tagata ni ‘ava mālosi, ma ‘o le to’atele fo’i, ‘e le’o iloa, ‘ua lātou solia le tūlāfono.  Na fa’aalia ‘e le faipule ‘o le East Coast, Dana Kirkpatrick, ‘o le tūlāfono na faia ‘i le 2008, na fa’asāina ai ‘i le tūlāfono le ‘ave ‘o le ipu tī ma le ipu kofe, po’o le ‘ava mālosi ‘i tagata ‘e ō atu ‘e fa’afuna pe teu o lātou lauao, ‘ae ‘ua āga’i le pili fou ‘e sui.  Na saunoa le faipule, ‘e iai lo lātou manatu, ‘e tatau ‘ona maua sina ipu ‘e fa’ato’afīlēmū lelei ai, ‘a’o teu o lātou lauao. 

‘O le tala ‘a Grant Bettjeman ‘i le Leitiō Niu Sila, ‘o se tagata ‘e iai sona fale teu ulu, ‘a ‘ē alu ‘i totonu ‘o se fale ‘oti ulu, ‘e lē na’o le teuga ‘o lou lauao, ‘ae ‘e ofo atu le tī, kofe po’o le uaina pe ‘ā te’a le 5 ‘i le afiafi.  ‘Ae lēai fo’i se tagata ‘e faia su’esu’ega mō le soifua mālōlōina na fa’ailoa ni atugaluga.  ‘E māsani ‘ona siaki ‘e le soifua mālōlōina la lātou pisinisi, ma lātou te tausisia fo’i le soifua mālōlōina ma le tū mamā peita’i, ‘e le’i fai atu lava ‘iā ‘i lātou, ‘e fa’asā ‘ona ofoina atu ‘i tagata ni vaiinu vevela ‘i totonu ‘o le fale teu ulu.  ‘O le popōlega ‘o ia pisinisi, ‘ona ‘e ono fa’aitīitia ai le ō atu ‘o tagata, ‘ona ‘o le ‘ā lē toe ofoina atu ‘i ai ni ipu kofe po’o le tī po’o se uaina.  ‘O lo’o aofia ‘i le pili fou, le fa’ataga ‘o tama’i ta’ifau ‘i totonu ‘o fale teu ulu.

Link to RNZ (Article) translated by Savelina Kasiano: https://www.rnz.co.nz/news/national/534997/bill-to-allow-hair-salons-to-provide-beverages-surprises-industry

ATA: Sāmoa Capital Radio (file).