‘O le ‘ā tūtū ‘a’ai leoleo ‘i Rotorua mō ni uiga solitūlāfono ‘e ono faia ‘i le taimi ‘o le falelauasiga ‘o se talavou na lavea ‘i se ta’avale.

‘Ua fa’ailoa mai ‘e leoleo ‘i le a’ai ‘o Rotorua, ‘o le ‘ā lēai se avanoa ‘e tu’ua ‘i ni uiga solitūlāfono ‘e ono fa’aalia ‘e sui ‘o ni kegi ‘ua potopoto atu mō le falelauasiga ‘o se talavou na maliu ‘i le Aso Tofi ‘a’o tuli ma se ta’avale ‘a leoleo ‘i lea vāega ‘o le Motu ‘i Mātū.

Na tā’ua ‘i se līpoti ‘a le nusipepa, ‘o le Rotorua Daily Post, ‘o le talavou na maliu ‘e iai ni ona so’otaga ma ni kegi ‘e a’afia ai ona ‘āiga.  Na fa’aalia mai ‘e le Ta’ita’i Leoleo mō lea itūmālō ‘o Niu Sila, ‘o Inspector Herby Ngawika, ‘o lo’o mata’itūina lelei ‘e leoleo le fa’agāsologa ‘o saunīgā ‘o le maliu ‘o lenei taule’ale’a talavou, ‘a’o fa’asolo ‘ona fa’atupula’ia le aofa’iga ‘o sui ‘āuai ‘o kegi ‘o lo’o gāsolo atu ‘i  ai.

‘O le ‘ā fa’asolo ‘ātoa fo’i tiute ‘a leoleo, ‘ina ‘ia mautinoa ‘e lēai ni uiga ma ni āmioga fa’atupu fa’alavelave ‘e aliali mai, ma ‘ia mautinoa le saogalēmū ‘o isi tagata ‘uma.  Na tā’ua fo’i ‘e le ali’i ta’ita’i leoleo, ‘ua ‘uma ‘ona feiloa’i ma ta’ita’i ‘o kegi ‘o lo’o a’afia ma fa’ailoa atu ‘i ai le gāioiga ‘a leoleo ma le tūlaga ‘e tatau ‘ona iai.  ‘Ua fautuaina mai fo’i ‘e le ali’i ta’ita’i leoleo le atunu’u ‘ina ‘ia feso’ota’i vave atu pe ‘ā va’aia ni uiga fa’alētonu ma solitūlāfono ‘e ono faia ‘e tagata ia ‘o lo’o āga’i atu mō le tangi ‘o lea maliu ‘i Rotorua.

 Link to RNZ (article) translated by Savelina Kasiano:https:https://www.rnz.co.nz/news/national/532723/rotorua-fatal-crash-ngongotaha-residents-fears-as-gangs-swarm-to-teen-s-tangi

Ata: RNZ / Cole Eastham-Farrelly