‘O fea na ‘āmata mai ai le taumafaiga mō le sitiseni ‘o tagata Sāmoa ‘i Niu Sila?
‘Ua pāsia le pili ‘o sitiseni Niu Sila ‘o tagata Sāmoa na soifua a’e ‘i le vā ‘o le 1924 ma le 1948 pei ‘ona i’u ‘i ai le pālota ‘a faipule ‘o le Fono ‘a le Palemene ‘o le mālō ‘o Niu Sila. Na ‘āmata mai lenei matā’upu ‘i le tausaga ‘o le 1978, ‘ina ‘ua lokaina ‘e sui ‘o le ‘Ōfisa ‘o Femalagāa’iga le tama’ita’i ‘o Falema’i Lesā, sa kuka ‘i se faletalimālō ‘i Uēligitone. ‘O le mau ‘o le ‘Ōfisa ‘o Femalagāa’iga, ‘e lēai se aiā tatau ‘a Falema’i ‘e nofo ai ‘i Niu Sila. Na finau Falema’i ‘i le tūlāfono, ma o’o lava ‘i le fa’amasinoga pito maualuga ‘a Niu Sila ‘i lea vāitaimi, le Privy Council ‘i Peretānia. ‘O le 1982, na faia ai le fa’ai’uga ‘a le Privy Council, ‘o tagata Sāmoa na soifua pe fananau ‘i le vā ‘o le 1924 ma le 1948, ‘o ni British subjects, ‘ona ‘o Sāmoa sa i lalo ‘o le Pulega a Niu Sila, ‘o se vaega ‘o le pūlega faamalumalu ‘a Peretania ‘i lea taimi ma ‘o le ala lea, ‘e agava’a ai ‘i lātou ‘i le sitiseni Niu Sila. Peita’i, ‘o le tausaga lava lea, na faia ai le tūlāfono ‘i lalo ‘o le faigāmālō ‘a Muldoon, na fa’alēaogāina ai lea fa’ai’uga.
‘O le tausaga ‘e 2003, na ta’ita’ia ai ‘e Anae Arthur Anae ni solo tete’e ‘i Niu Sila fa’apea ma Sāmoa, na fa’aosofia ‘e sui pālota mai lona itūmālō, na vala’au ‘i lana polokalame ‘i le leitiō Radio 531pi. ‘Ua 27 tausaga ‘o finau Anae mo lenei matā’upu. ‘Ina ‘ua fesiligia ‘e Murray Faivalu ‘o le Si’ufofoga ‘o le Laumua ‘i le finauga ‘o lenei matā’upu na ia saunoa ai, ‘o se aso ‘e fiafia ma patipatia ‘e lē gata ‘o Sāmoa ‘i Niu Sila ‘ae fa’apea ai ma tagata ‘i Sāmoa peita’i ‘e iai nisi vāega sa ia finauina pea. Sa fesiligia ‘e Murray po’o le ā le isi la’asaga ‘o le ‘ā aga’i iai, na saunoa Anae, ‘i lona manatu, pe sili atu le nonofo pea ‘i Samoa ‘o ē agava’a pe ‘ā le fia malaga mai, ‘ae ‘ia maua le 50 pasene ‘o la lātou penisiona mai Niu Sila.
O le tūlaga fo’i ‘i fa’amaumauga ‘a ē na tete’e ‘i le aofia ai ‘o fānau ‘a ‘i lātou ‘ua agava’a ‘i lenei pili ‘e fa’apea ‘e selau afe, na saunoa Anae, ‘e lē sa’o ia fa’amaumauga, ‘ona i lona talitonuga, pe na’o le 15,000 le aofa’iga ‘o fanau ‘a ē ‘o lo’o agava’a i lenei pili ‘o se tasi fo’i lenei ‘o matā’upu ‘o lo’o fīnau ai le afioga ‘a Anae, i le tūlaga o pepa malaga, ‘e tatau ‘ona tu’uavanoa ‘i tagata Pasefika ‘uma, ‘e mafai ai ‘ona malaga mai ‘i Niu Sila ‘e aunoa ma ni visa, ‘ae ‘ā taunu’u, ‘ona tu’u lea ‘o le visa asiasi mo le tolu māsina ‘i le tusifolau. ‘Ae ‘ā lē usita’ia tu’utu’uga ‘o lea visa, ‘ona fa’asala lea ‘i le tolu tausaga ‘e lē toe mafai ai ‘ona tūvae ‘i Niu Sila.
‘E le’o tumu fo’i le Quota ‘i tausaga ta’itasi, sā fīnau fo’i, pe ‘ā fai ‘e laki le nūmera ‘a le tagata ‘i le se’i, ‘ona tu’u lea ‘i ai ‘o le avanoa mō le visa faigāluega ‘e 12 māsina ‘e sau ai ‘e faigāluega muamua ‘ina ‘ia fa’amalieina vāega ma tu’utu’uga ‘o le visa, ‘o le ‘ā fa’aauau pea ‘ona fīnauina ia matā’upu pei ‘ona saunoa Anae, ‘o se tasi na i le faigāmālō ‘a le National ‘i totonu ‘o le Palemene ‘o Niu Sila.
Some parts of this article was retrieved from RNZ’s Article: https://www.rnz.co.nz/international/pacific-news/534339/685-s-to-the-world-restoring-citizenship-bill-passes-with-unanimous-support
ATA: 1. Falema’i Lesa having just won her case for citizenship with the Privy Council – Photograph taken by Peter Avery Photo: Peter Avery & 2. Former National MP Anae Arthur Anae and Repeka Lelaulu president of P.A.C.I.F.I.C.A Inc 20 November 2024 Photo: RNZ Pacific/Coco Lance