Nikki Kaye: Tele ma anoanoa’i mea na ia ‘ausia ‘i totonu ‘o le 44 tausaga

‘E manatua le tama’ita’i na ‘avea ma Minisitā, Nicky Kaye ‘i le tele ‘o mea na ia ‘ausia ‘e ui ‘i le pu’upu’u ‘o le taimi na soifua ai ‘i lenei lalolagi ma ‘o se tasi ‘o faipule pito sili ‘ona lototele ‘i Niu Sila.  Na ulua’i ulufale ‘i le Palemene ‘i le tausaga ‘e 2008, ‘o se tasi ‘o faipule ma minisitā ‘i se faigāmālō ‘a le National, ‘ina ‘ua manumālō ‘i le nofoa fa’aitūmālō ‘o ‘Aukilani Tūtotonu, ‘o se faipule muamua lea ‘a le National ‘ua ‘ausia lea tūlaga. 

Na tu’umālō Kaye ‘i le fa’ai’uga ‘o le vāiaso, mai se gasegase ‘o le kānesa na a’afia ai ‘i le tausaga ‘e 2016, na fa’ase’e ‘ese ai ma le Palemene, ‘ae faia ona togafitiga.  Na saunoa Sir John Key, le palemia ‘i lea taimi, ‘o le kānesa ‘o Kaye, sa ogaoga atu nai lō le tūlaga na fa’alauiloaina ‘i le atunu’u ‘i lea taimi.  Na fa’ailoa ‘i lea taimi, le a’afia ‘o le tama’ita’i faipule ‘i le kānesa ‘o le susu, peita’i, na saunoa Sir John, ‘o le taimi lea, ‘ua telē le sosolo ‘a le kānesa, ma i’u ai loa ‘ina tu’u atu lana fa’amāvaega.  ‘Ae na ia tē’enaina, ma ta’u atu ‘i ai, ‘e alu ‘e fai ona togafitiga, ‘ae toe fo’i atu pe ‘ā māe’a.  Sa toe fo’i atu Kaye ‘e galue ‘e ui ‘i le tūlaga fa’alētonu ‘o lona soifua mālōlōina, ‘ae ‘o lona toe fo’i ‘i le gāluega, na fesoasoani ai ‘iā te ia, lea na toeitiiti ‘ātoa le isi sefulu tausaga, ‘o soifua pea.  ‘O le māsina ‘o Iūlai 2020, na faia ai lana saunoaga fa’amāvae ‘i le palemene, mā ‘e le’i tā’ua ai lava lona gasegase ‘o le kānesa.  Sa ia fa’ao’o atu se fe’au ‘i sui ‘o le Palemene ‘o tautua mō le atunu’u, a’o le’i tu’umālō.

Link to RNZ (Article) translated by Savelina Kasiano: https://www.rnz.co.nz/news/political/534875/nikki-kaye-she-achieved-a-remarkable-amount-in-44-years

ATA: Nikki Kaye has died at 44. Photo: RNZ / Rebekah Parsons-King