Mōlia se kamupani nonōtupe ‘i ‘Aukilani ‘ona ‘o nonōgātupe ‘e fa’asā ‘i le tūlāfono

‘Ua mōlia se ‘au’aunaga nonōtupe ‘e le’i resitalaina ‘ona ‘o lo lātou faia ‘o ni nonōgātupe ‘e lē fa’atagaina ‘i le tūlāfono, ‘i tagata Tonga ‘i ‘Aukilani ‘i Saute.  Na faia ‘e Ilaisaane Malupo, po’o le Nane Easy Loan Finance Services NZ (Nane Loans), ni nonogātupe ‘āmata mai ‘iā Mati 2024. 

Sā faia se su’esu’ega ‘e le komisi ‘ina ‘ua maua ni talosaga, ‘e aofia ai se talosaga mai se tagata ‘e faia fautuaga ‘i matā’upu tau tupe, ‘e fa’atatau ‘i le fa’atinoga ‘o ‘au’aunaga ‘a Malupo ‘i nonōgātupe, lea ‘e fa’apea ‘ua matuā āfāina ai lava tagata nonōtupe.

‘O le fa’aaliga ‘a le Komisi ‘e mata’itūina po’o mulimulita’ia ‘e pisinisi aiāiga ‘e puipuia ai tagata fa’atau, sā fa’atūlaga ‘e Malupō ana pasene tului ‘i ni tūlaga maualuluga ‘e o’o atu ‘i le ta’i 15 pasene ‘i le vāiaso, ma ‘e fa’aluaina lea pasene tului pe ‘ā fai ‘e lē totogiina le ‘aitālafu ‘i totonu ‘o aso ‘e 28, ‘ae o’o atu ‘i le $10 ‘e totogi ‘i le aso pe ‘ā fai ‘e tuai ‘ona totogi le ‘aitālafu. 

‘I lalo ‘o le tūlāfono, ‘e tatau ‘ona resitala ‘uma kamupanī po’o ‘au’aunaga nonōtupe ma ‘ia pāsia ‘e mafai ai ‘ona o lātou faia ‘aitālafu ‘i tagata. Na fa’aalia ‘e le Komesina Lagolago, Joseph Liava’a, ‘o itū’āiga ‘au’aunaga nonōtupe ia, ‘e i’u ‘i ai tagata ‘ua matuā faigatā lava ‘ona faia ni nonōgātupe ‘i ‘au’aunaga ta’uleleia.  ‘E to’atele tagata na nonō mai tupe ‘i le tama’ita’i ‘o Malupo, ‘o tagata ia ‘ua leva ‘ona feagai ma faigatā ma ‘e maualalalo fo’i a lātou tupe maua.  ‘O nisi fo’i ‘o ia tagata, na o lātou fa’aalia, ‘e mo’omia le nonō mai ‘o tupe ‘e fa’atau ai taumafa ma totogi ai fo’i isi a lātou ‘aitālafu. 

Na tā’ua ‘e le komisi, na fa’atinoina le ‘au’aunaga ‘a Malupo ‘i luga ‘o ‘upega ‘o feso’ota’iga, ‘e fa’amata’uina fo’i tagata nonōtupe, ‘ā fai ‘e lē totogiina a lātou ‘aitālafu, ‘o le ‘ā fa’ailoa loa o lātou igoa ‘i luga ‘o le Facebook po’o ‘upegatafā’ilagi ‘a Tonga.

‘Ua faia ‘e le komisi ni moliaga ‘e fa’asaga ‘iā Malupo ‘i le Fa’amasinoga Fa’aitūmālō ‘o ‘Aukilani, ‘i lona fa’atinoina ‘o ni ‘au’aunaga nonōtupe ‘e aunoa ma sona resitala fa’atasi ai ma lona taumafai ‘e ta’ita’iina sesē le komisi.

Link to 1News (Article) translated: https://www.1news.co.nz/2025/06/12/auckland-lender-charged-for-allegedly-providing-illegal-person-loans/?utm_source=Iterable&utm_medium=email&utm_campaign=FiveBigThings

ATA: SCR (file).