Mōlia ‘e le Komisi mō matā’upu tau ‘i Pisinisi, le kamupanī ‘a le One NZ

‘Ua faia se tagi ‘a le Komisi ‘e mata’itūina po’o mulimulita’ia ‘e pisinisi le tūlāfono ‘o fefa’ataua’iga talafeagai, le kamupani ‘a le One New Zealand, ‘ona ‘o fa’asalalauga taufa’asesē ‘e fa’apea ‘e 100 pasene le mālosi po’o ‘o le mamao ‘e o’o ‘i ai la lātou ‘au’auaga ‘o telefoni fe’avea’i, mai la lātou satelite lea ‘o lo’o tāpena ‘i ai.  ‘O le talitonuga ‘o le komisi, ‘ātonu ‘ua solia ‘e lea fa’asalalauga fa’apisinisi, le Tūlāfono ‘o Fefa’ataua’iga Talafeagai.  ‘O le ‘au’aunaga ‘o ia satelite ‘o lo’o fa’agāioiina ‘e le kamupani ‘o le Space X ‘a le ali’i pilionea ‘Amerika ‘o Elon Musk.  ‘O le fa’asalalauga lea sa fa’agāsolo ‘iā ‘Aperila 2023, ‘ina ‘ua toe sui le igoa ‘o le One NZ mai le Vodafone. 

‘O le māsina ‘o Iuni 2023, na fa’ailoa atu ai ‘e le komisi ‘i le One NZ ‘ua tatau ‘ona tāofi le fa’alauiloga ‘o le ‘au’aunaga ‘o telefoni fe’avea’i ‘e 100 pasene le mafai ‘ona maua ‘i so’o se vāega ‘o le atunu’u.  Na saunoa le sui ta’ita’ifono ‘o le komisi, Anne Cllinan, i lo lātou talitonuga, ‘e fōliga mai ‘e ta’ita’iina sesē tagata mai ia fa’asalalauga, ‘ona ‘o lo’o lātou momoli atu le lagona ‘e fa’apea ‘o ‘au’aunaga ‘uma lava ‘o telefoni fe’avea’i ‘i le taimi nei, ‘e pei ‘o le text, vala’au ma data – ‘o le ‘ā maua mai le 2024, ma ‘o le ‘ā maua ‘i se taimi vave ‘e tagata ni feso’ota’iga mai so’o se vāega ‘o Niu Sila, peita’i, ‘e le’o le tūlaga lenā ‘o lea ‘e iai.  Na fa’aalia ‘e le One NZ, ‘o le ‘ā finau mālosi ‘e tete’e ‘i ia moliaga.

Link to RNZ (Article) translated by Savelina Kasiano: https://www.rnz.co.nz/news/business/533727/commerce-commission-files-charges-against-one-nz-over-100-percent-coverage-campaign

ATA: RNZ/Nate McKinnon