Mōlia ‘e le Commerce Commission le ‘Ea Niu Sila

‘Ua faia ‘e le Commerce Commission ni mōliaga fa’asaga i le kamupanī va’alele ‘a le ‘Ea Niu Sila, i lalo o le tūlāfono ‘o fefa’ataua’iga talafegai. ‘Ua tu’ua’ia le kamupanī ‘i le tu’uina atu ‘o fa’amatalaga sesē ‘e uiga ‘i aiā tatau a tagata, ‘e toe maua ai ā lātou tupe, pe ‘ā fa’aletonu se faigāmalaga ‘ona ‘o ni fa’afītāuli tau i le kamupanī.
‘O ia fa’afītāuli ‘e aofia ai le fa’alētonu ‘o va’alele, gasegase le ‘aufaigāluega, ma le fa’atuai ‘o gāluega fa’atino ‘a le kamupanī. Na tā’ua ‘e le sui ta’ita’ifono ‘o le Commerce Commission, Anna Callinan e fa’apea, ‘i totonu ‘o le lima tausaga ‘ua mavae, ‘e tele fa’aseā ‘a tagata malaga ‘e fa’atatau ‘i le ‘Ea Niu Sila.
‘O nisi o pāsese na lē maua tupe sa tatau ona toe totogi atu iā ‘i lātpu ‘e tusa ai ma le tūlāfono, ‘ona ‘o fa’amatalaga lē sa’o na tu’uina atu ‘e le kamupanī. ‘Ua tu’ua’ia fo’i le kamupanī ‘i le tē’enaina ‘o nisi talosaga sa tatau ona talia. Peita’i, ua fa’aalia ‘e le ‘Ea Niu Sila lō lātou lē fiafia ‘i le fa’ai’uga ‘a le Commerce Commission ‘e ‘ave le matā’upu ‘i le fa’amasinoga.
Na fa’ailoa ‘e le ‘Ea Niu Sila ua māe’a ona toe iloiloina le silia i le 62,000 ‘o talosaga mō tupe totogi, ma ‘e itiiti ifo ‘i le tasi pasene na maua ai ni mea sesē. ‘Ua ‘uma fo’i ona fa’afeso’ota’i tagata na a’afia, toe fa’asa’o mea na sesē, ma faia suiga ‘i a’oa’oga ma ta’iala mō ana tagata faigāluega ‘ina ‘ia lē toe tupu lenei fa’afītāuli.
Na fa’amanino ‘e le Consumer NZ e fa’apea, ‘afai ‘e fa’aalu ‘e se tagata malaga se tupe fa’aaopoopo ‘ona ‘o le tuai po’o le fa’alēaogāina ‘o se faigāmalaga, ‘ona ‘o se fa’afītāuli’e mafai ona fa’atonutonuina ‘e le kamupanī va’alele, ‘e ‘iai le aiā tatau ‘a le tagata malaga ‘e talosaga ai mō le toe totogiina mai ‘o lana tupe. ‘E le’i leva atu nei ‘ona fa’asalaina le kamupanī va’alele a le Jetstar ‘i le 2.25 mīliona ‘ona ‘o se matā’upu fa’apea.
Link to RNZ (Article): https://www.rnz.co.nz/news/business/2680040/commerce-commission-files-charges-against-air-new-zealand
IMAGE/ATA: Supplied / Air New Zealand
