Maualalo lāfoga totogi ‘a le ‘au mau’oloa Niu Sila nai lō isi atunu’u

‘E lāiti ifo lāfoga ‘e totogi ‘e tagata pito tele tupe ‘i Niu Sila nai lō tagata mau’oloa ‘i isi atunu’u ‘e 9 ‘i totonu ‘o le lisi ‘o mālō ‘e lelei ‘o lātou ātia’ega ma tamāo’āiga pei ‘ona fa’aalia ‘i se su’esu’ega fou na lipotia ‘e le Leitiō Niu Sila.  ‘O Niu Sila le atunu’u ‘e pito maualalo lava le lāfoga ‘e totogi mō tupe maua, ‘e lēai ni lāfoga māsani mō polōfiti ‘o ‘āseta, ma ‘e lēai fo’i lava nisi itū’āiga lāfoga fa’apitoa mō ē tele tupe ‘e tusa ai ma se sā’ili’iliga ‘a le Iunivesitē ‘o Vitoria na fa’atūlagaina ‘e le Tax Justice Aotearoa. 

Sa va’ava’ai le sā’ili’iliga, pe fia se lāfoga ‘a se tagata ‘e fa’alimaina le maualuga ‘o lona totogi nai lō le totogi fua fa’a’ōgātotonu ‘i Niu Sila pe tusa lea ma le 330,000 tālā ‘e totogi ‘i totonu ‘o isi atunu’u ‘e 9 ‘i le OECD.  ‘O atunu’u na filifilia ‘e fai ‘i ai le fa’atusatusaga, ‘e aofia ai atunu’u ‘e tautalaina ai le gagana ‘Igilisi, ‘ae tai tutusa a lātou faigāmālō ma Niu Sila, ‘e aofia ai ‘Ausetālia, Kānata, le Iunaite Setete ma atunu’u ‘e lima ‘i ‘Europa.  Sa fa’aaogāina fa’amaumauga ‘a le OECD 2023, ma ‘āfai ‘e iai se tagata ‘e $330,000 tālā lana tupe maua na totogi ‘ātoa le lāfoga ‘e pei ‘o tūlaga māsani, ‘e 33 pasene na te totogiina, po’o le $108,000 tālā. 

‘O se lāfoga pito sili ‘ona maualalo mai tupe maua pe ‘ā fa’atusa ‘i isi atunu’u ia pei ‘ona tā’ua, lea ‘e mai le 37 āga’i ‘i le 55 pasene lāfoga ‘e totogi, pei ‘ona fa’aalia ‘e se tagata su’esu’e sinia ‘i le Iunivesitē ‘o Vitoria, Max Rashbrooke.  ‘O ia fo’i lea na fa’atautaia le iloiloga ‘o ia fuainūmera ma fa’amaumauga.  ‘O Niu Sila ma Belgium atunu’u ‘e lēai ni lāfoga ‘e totogiina mai polōfiti fa’aopoopo ‘o se fale ‘e fa’atau atu.  Peita’i ‘e iai isi lāfoga ‘e totogi ‘e tagata mau’oloa ‘o Belgium, ‘ae lēai ‘i Niu Sila.  Na tā’ua ‘e le ta’ita’ifono ‘o le Tax Justice Aotearoa, Glenn Barclay, ‘o le iloiloga lea na faia, ‘ua fa’afetauia ai fa’amatalaga ‘o lo’o faia ‘i le polokalame fa’agāsolo ‘a le Leitiō Niu Sila ‘i tagata mau’oloa lea ‘ua fa’aigoaina ‘o le RICH, ‘e fa’apea, ‘āfai ‘ae totogi se capital gains tax ‘i totonu ‘o Aotearoa, ‘o le ‘ā ‘ave ‘e tagata mau’oloa a lātou tupe ‘i fafo. 

Link to RNZ (Article) translated by Savelina Kasiano: https://www.rnz.co.nz/news/in-depth/528379/wealthy-people-pay-lower-tax-in-nz-than-in-similar-states-study-shows

ATA: Glenn Barclay. VNP / Phil Smith (RNZ).