Maua le ‘ioega ‘a le Pūlēgānu’u ‘a Porirua mō ‘au’aunaga ‘o le suāvai ‘i le lumana’i

‘O ananafi na ‘ioe ai le Pūlēgānu’u ‘a le ‘a’ai ‘o Porirua, ‘e gālulue fa’atasi ai ma isi pūlēgānu’u ‘i le itūmālō, ‘e fa’atū se ‘au’aunaga so’ofa’atasi mō le tufaga ma le fa’asoaga ‘o le suāvai fa’atasi ai ma se fuafuaga mō lona fa’atinoga. ‘E 9 pūlēgānu’u ‘i le itūmālō ‘o Uēligitone, fa’atasi ai ma le Pūlēgānu’u Fa’aitūmālō ‘o Horowhenua  sā gālulue fa’atasi ‘e tali ‘i le pōlisi ‘a le Faigāmālō Lāiti ‘o le Water Done Well, ma sā o lātou taulimaina fo’i se līpoti ‘i le ‘āmataga ‘o le māsina nei, sā fa’a’auivi atu ai se fautuaga ‘ina ‘ia gālulue fa’aitūmālō ‘i le ‘au’aunaga ‘o le fa’asoaga ‘o le suāvai.  

‘E tatau ‘ona o’o atu ‘i le māsina ‘o Sētema 2025, ‘ua tu’uina atu ‘i le Mālō ni fuafuaga ‘a pūlēgānu’u ‘uma lava mō le tilivaga ‘o le suāvai. ‘E mafai ‘ona gālulue le pūlēgānu’u lātou lava ia, pe gālulue fa’atasi fo’i ma isi pūlēgānu’u ‘ina ‘ia mafai ‘ona ‘ausia lea tūlaga ma ‘e tatau ‘ona o’o atu ‘i le fa’ai’uga ‘o lenei tausaga ‘ua faia sa lātou fa’ai’uga.  

Press release by Porirua City Council presented by Savelina Kasiano

Ata: Porirua City Council