Maoa’e le to’atele ‘o tagata su’e gāluega

Līpotia mai le maoa’e ‘o le aofa’iga ‘o tagata ‘o lo’o talosaga mō avanoa faigāluega ‘o lo’o fa’asalalauina ‘i totonu ‘o Niu Sila ‘i le taimi nei.

Na fa’ailoa mai ‘e nisi ‘o kamupanī ‘e feagai ma le fa’atalanoaina ‘o tagata talosaga mō gāluega, ‘ua mātauina, le faitau fia selau ‘o tagata ‘e talosaga atu mō se avanoa ‘e tasi, ma ‘ua mautinoa ai, le iai nei ‘o le māketi mō avanoa faigāluega ‘i totonu ‘o Niu Sila, ‘i se tūlaga faigatā ‘ona ‘o le to’atele ‘o tagata ‘o lo’o su’e gāluega.

‘Ua tu’uina mai ai fa’afautuaga ‘e nisi ‘o kamupanī, ‘ina ‘ia filifili lelei le avanoa ‘e talosaga ‘i ai pe ‘ā fai ‘o tau sā’ili se gāluega. Na tā’ua ‘e le fa’atonu ‘o le kamuanī ‘o le Frog Recruitment, ‘o Shannon Barlow, ‘o le tele ā ‘o kamupanī ‘ua lātou fa’aaogāina se polokalame ‘e iloa gōfie ai avanoa sā talosaga ‘i ai tagata su’e gāluega, ‘o lona uiga ‘ā fai ‘e te talosaga ‘i so’o se avanoa ma avanoa ‘uma ‘e fa’asalalauina, ‘e mafai ‘ona lē āmana’ia lau talosaga, ‘e tusa lava pē iai ou agava’a ‘e fetaui ma talafeagai ma se gāluega ‘e talosaga ‘i ai.

Na fa’aalia mai fo’i ‘e Lee Marshall, ‘o le pule ‘o le kamupanī ‘e igoa ‘o le Hunter Campbell, ‘e tatau ‘ona talosaga ‘i le avanoa ‘e fetaui ma le tomai ma ou agava’a, ‘ona ‘o le tele ‘o talosaga lātou te maua, ‘ua iloa ai ‘o le to’atele lava ‘e talosaga mō avanoa po’o gāluega ‘e lēai so lātou tomai ma se agava’a talafeagai.

Na ia tā’ua fo’i, ‘e faigōfie lava ‘ona iloa ‘iā lātou fa’amaumauga, ‘e iai tagata ‘ua ta’i 30 po’o le 40 āga’i atu ‘i le 50 taimi ‘ua talosaga ai mō ni avanoa faigāluega ‘i totonu ‘o le lua māsina na se’i mavae atu nei, mā ‘o se tūlaga lea ‘e ono lē manuia mō ia tagata.

Sā tā’ua fo’i le tāua tele ‘o le tāpena lelei ‘o le talosaga tūsia ma le CV, filifili lelei le avanoa ‘e ‘apalai ‘i ai, ma ‘ia maua ‘i le agaga ‘o le ‘onosa’i.

ATA: 123rf / RNZ.