Mana’o Vaovasamānaia ma le NZ First ‘ia tele ni pepe fou ‘e fānanau mai ‘i totonu ‘o Niu Sila

‘E mana’o le patī ‘o le NZ First, ‘ina ‘ia to’atele tagata Niu Sila ‘e maua ni ā latou pepe fou, ma ‘o le ‘a maua se taui mō ‘i latou ‘i le lumana’i.

‘O se vāega lea ‘o le folafolaga mai le Ta’ita’i ‘o le NZ First, ‘iā Vaovasamānaia Winston Peters, ‘i se fonotaga ‘a lea vāega fa’a’upufai’omālō, sa faia ‘i le ‘a’ai ‘o Masterton, ‘i le Aso Sā.

Na tā’ua ai ‘e Vaovasa, ‘ua feagai nei Niu Sila ma se tūlaga pa’ū ‘i le faitau aofa’i ‘o ona tagata, ma ‘ua iloa fo’i ‘i fa’amaumauga, le pa’ū ‘o le aofa’i ‘o sitiseni Niu Sila ‘e maua ni pepe fou.

Sa ia fa’amamafaina ai, ‘e matuā mana’omia lava tagata Niu Sila ‘ina ‘ia fanafanau ma uluola, ma ‘o se tasi ‘auala ‘e mautinoa ai lea tulaga, ‘o le fa’aitiitia lea ‘o le tau, ‘o le va’aiga ma le tausiga ‘o ‘āiga.

‘O le polisi ma le faiga fa’avae mo le finauina ‘o le palota ‘iā Nōvema, ‘e pei ‘ona polōmisi mai ‘e Vaovasa ma le NZ First, ‘e fa’aigoaina, ‘o le Kiwi Kids Grant.

‘O lea faiga fa’avae, pe ‘afai ‘e toe iai le NZ First ‘i totonu ‘o se faigāmālō, ‘o le ‘a latou ūna’ia ai le totogina lea ‘i ulugāli’i ‘uma ‘o se seleni ‘e $5,000 afe talā ‘i le tausaga mo le ulua’i tolu tausaga, mo le aofa’iga ‘e to’atolu tamaiti ‘o se fanau.

Na fa’aālia ‘o ulugāli’i ‘e agava’a mō lea polokalame, ‘e tatau ‘ona sitiseni le tasi ‘o lā’ua, ma ‘afai ‘e taunu’u, na tā’ua ‘e le ta’ita’i ‘o le NZ First, ‘o lea polokalame, ‘o le ‘a fa’afoe ma pūlea mai ‘e le Matāgaluega ‘o Lāfoga po’o le IRD.

Sa ia fa’amamafaina ai, ‘o le agaga ‘autū, ‘ina ‘ia mafai ‘ona si’itia ai le fua ‘o pepe fou ‘e fānanau mai ‘i totonu ‘o Niu Sila nai lō le tulaga ‘o lo’o iai ‘i le taimi nei.

Link to RNZ (Article): https://www.rnz.co.nz/news/politics/862035/new-zealand-first-kiwi-kids-grant-plans-to-pay-parents-for-having-children

IMAGE/ATA: RNZ/Giles Dexter