Mana’o le Mālō ‘e fa’atapula’a tamaiti lalo ‘o le 16 tausaga mai le fa’aaogāina ‘o le Social Media

‘Ua fa’ailoa mai ‘e le faigāmalo so’ofa’atasi, ‘o le ‘ā ‘āmata ‘ona fa’agāsolo su’esu’ega ‘e uiga ‘i le fa’atapula’aina ‘o le fa’aaogāina ‘e tamaiti ‘i lalo ifo ‘o le 16 tausaga le mātutua, ‘o feso’ota’iga televavave, po’o le social media.

Na fa’aalia mai ‘e le ali’i palemia ‘iā Christopher Luxon ‘i le afiafi ‘o le Aso Sā, ‘o lenei su’esu’ega ‘o le ‘ā fa’atino ‘o se vāega ‘o le polokalame ‘o galuega fai ‘a le faigāmālō.

Na ia tā’ua ai, ‘o le ‘auga ‘o lenei fa’amoemoe, ‘ina ‘ia fa’aitiitia le a’afiaga ‘o alo ma fānau ‘i lō lātou fa’aaogā lea ‘o le social media.

‘O lo’o atugalu le ali’i palemia ma le faigāmālō, ‘i le itū ‘ua ia fa’amatalaina, ‘o le “āfāina” ‘o tupulaga talavou ‘o Niu Sila, ‘i fa’alētonu ‘e ‘auala mai luga ‘o le social media, mā ‘e manatu le palemia ‘o le fa’atapula’aina ma le fa’aitiitia ‘o le fa’aaogāina ‘e tamaiti ‘i lalo ‘o le 16 tausaga le mātutua, ‘o feso’ota’iga televavave, ‘o le ‘ā fesoasoani tele ‘e puipuia ai ‘i lātou, mai ia tūlaga ‘e manuia.

‘O lenei fa’asalalauga mai le mālō ‘i le Aso Sā ananafi, ‘ua soso’o ma le tele ‘o manatu ma lagona fa’aalia ‘o tagata, ‘ina ‘ua faia se gāioiga fa’apea ‘a le Mālō ‘Ausetālia ‘e fa’aitīitia ai le fa’aaogā ‘i tupulaga talavou ‘o feso’ota’iga televavave.

Link to 1News (Article) translated: https://www.rnz.co.nz/news/political/560623/social-media-ban-for-young-people-to-be-investigated-luxon

ATA: RNZ.