Mana’o le Labour ‘i se su’esu’ega ‘a le Su’etusi Sili ‘i le lāfoga ‘o tapa’a ma sikaleti

‘Ua talosagaina ‘e le pātī ‘a le Labour, le faia ‘o se su’esu’ega ‘a le Su’etusi ‘a le Mālō, ‘i se fa’ai’uga ‘a le faigāmālō so’ofa’atasi, ‘ua fa’apa’ū ai le lāfoga totogi ‘o nisi ‘o sikaleti ma tapa’a, ‘ona ‘e manatu le Labour na māfua lea fa’ai’uga ‘ona ‘ia manuia ai kamupanī gaosi sikaleti.

‘O le Sui So’oupu ‘o le Labour mō matā’upu tau ‘i le Soifua Mālōlōina, ‘o Ayesha Verral, ‘o lo’o taulāmua ‘i lea talosaga pei ‘ona tu’uina atu ‘i le Su’etusi Sili ‘a le Mālō, ‘o John Ryan, ‘e faia ‘i ai sana sā’ili’iliga fa’anatinati ‘i lalo ‘o le Tūlāfono le Public Audit Act.

‘O se fa’ai’uga lata mai nei ‘a le Minisitā lagolago ‘o le Soifua Mālōlōina, ‘o Casey Costello, na fa’apa’ū ai ‘i le ‘afa, le fua ‘o le lāfoga totogi mō ‘oloa ia ‘e tā’ua ‘o heated tobacco products, po’o HTP’s ma pāsia ai ‘e le kapeneta le fa’apa’ū ‘o se vaegātupe ‘e tusa ma le $216-miliona Tālā, ‘e kava ai le tupe ‘o le ‘ā lē maua mai ‘i lea lāfoga.

Na fa’aalia ‘e le minisitā, ‘o le agaga na ia fa’apa’ūina ai lenei lāfoga, ‘ina ‘ia ūna’ia ai tagata ‘e fa’aaogā mea nei ‘o HTP’s ‘ina ‘ia tau fa’aitīitia ai le ulaula tapa’a.

Link to RNZ (Article) translated by Lauano Ilaoa:https://www.rnz.co.nz/news/in-depth/531470/auditor-general-asked-to-investigate-costello-decision-to-slash-tax-on-heated-tobacco-products

ATA: Minisitā lagolago ‘o le Soifua Mālōlōina, Casey Costello. Photo: RNZ / Reece Baker