Mana’o le Labour ‘e tāofi mō se taimi le fa’atupega ‘o le Gumboot Friday ‘ona ‘o tala ‘a Mike King ‘i le ‘ava mālosi

‘Ua tē’ena ‘e le Fa’alāpotopotoga ‘o le Drug Foundation, ni fa’a’upuga ‘a Mike King ‘e fa’apea ‘o le ‘ava mālosi, ‘e lē ‘o se fa’afītāuli mō tagata ‘e iai gasegase ‘o le māfaufau.  Na tā’ua ‘e le fa’alāpotopotoga, ‘o se saunoaga ‘e lē maua ai se to’omaga ‘i taimi ‘o a’afiaga ‘o le māfaufau ‘i fa’afītāuli.   Sa fa’atalanoa King ‘i le Newstalk ZB ma sā fesiligia ai ‘i le so’otaga ‘o le ‘ava mālosi ma le pule ‘i le ola.  Na tali King, ‘e lē’o se fa’afītāuli le ‘ava mālosi mō tagata ‘e iai a’afiaga ‘i le māfaufau.  Na ia toe saunoa ai, ‘o le ‘ava mālosi, ‘e puipuia ai nisi tupulaga talavou se to’atele mai le fa’a’uma o ō lātou lava soifua. 

Na vave ‘ona toe puipui ‘e King lana fa’amatalaga na faia, ‘e fa’apea, sā ia fa’aaogāina fo’i fuālā’au fa’asāina ma le ‘ava mālosi, ‘e tāofiofi ai se leo na ia fa’alogoina ‘i totonu ‘o lona māfaufau ma sa ‘avea pei ‘o se ofu fa’aola se’ia o’o ‘ina maua le avanoa ‘i fa’atalanoaga fesoasoani (counselling).  ‘E 24 miliona tālā ‘ua fa’atupeina ai ‘e le mālō le polokalame ‘a King ‘o le Gumboot Friday mō tausaga ‘e fa.  ‘Ua vala’au le Labour ‘i le mālō ‘ina ‘ia taofia mō se taimi le fa’atupega ‘o le I am Hope/Gumboot Friday, lea ‘o lo’o fa’alauiloaina ‘e King. 

Link to RNZ (article) translated by Savelina Kasiano: https://www.rnz.co.nz/news/political/532454/labour-wants-gumboot-friday-funding-paused-following-mike-king-s-alcohol-comments

Ata: RNZ / Samuel Rillstone