Mana’o le Iuni ‘a faiā’oga tūlaga lua ‘e tāpā le fesoasoani ‘a le ERA ‘i talanoaga ‘o totogi

‘Ua mana’o le Iuni ‘a faiā’oga ‘o ā’oga tūlaga lua, ‘ina ‘ia fesoasoani ane le ERA ‘i fa’atalanoaga ‘o totogi ‘o faiā’oga lea ‘ua tūtū ‘ua lēai se minoi.  Na tā’ua ‘e le Fa’alāpotopotoga po’o le Iuni ‘a le Educational Institute Te Riu Roa, na lē manuia fa’atalanoaga ‘i le vaiaso talu ai, ma lēai se māliliega na maua ai. 

Na saunoa Liam Rutherford ‘o lo’o tū ‘i le vā mō feūtaga’iga, ‘o le ofo ‘a le Matāgāluega ‘o A’oga sā ‘ese la’itiiti lava mai le ofo lea na tē’enaina ‘e sui ‘o le Iuni ‘iā Tēsema ‘i le tausaga talu ai.  Mā ‘e le’i maua ‘e faiā’oga ni fa’ai’uga na finagalo ‘i ai, lea ‘ua lātou tāpā ai le Pūlega mō Matā’upu Tau ‘i Gāluega po’o le ERA.  ‘O lo’o lātou fa’amoemoe ‘ina ‘ia mafai ‘ona sāga’i ane le mālō ma taumafai ‘e fa’amāe’a la lātou matā’upu.

‘O le ofo ‘i le māsina ‘o Tēsema, ‘e 2.5 pasene le si’itaga ‘e maua ‘i le fa’ai’uga ‘o Ianuari ma le isi 2.1 pasene ‘i se taimi mulimuli mai ‘o le tausaga.  Na talia ‘e faiā’oga ‘o kolisi se ofo fa’apea ‘i le tausaga talu ai. 

Ma saunoa le Komesina ‘o ‘Au’aunaga ‘a le Mālō Sir Brian Roche ‘i le ‘āmataga ‘o le vaiaso nei, ‘e misi ‘e faiā’oga ‘o ā’oga tūlaga lua le si’itaga ‘o totogi ma fa’amanuiaga ia na lātou tē’enaina.

Link to RNZ (Article) translated: https://www.rnz.co.nz/news/political/588604/primary-teachers-union-seeks-era-intervention-in-stalled-pay-talks

ATA: RNZ / Alexander Robertson