Mana’o le Greens ‘e fa’amuta pulega ‘o supamaketi ‘e lua ia ‘e māfua ai ‘ona taugatā le tau ‘o meataumafa

‘O lea ‘ua fa’asolo fa’atōsina ‘a le pātī ‘o le Greens, mō le fa’avaeina lea ‘o se supamaketi ‘a le Mālō, ‘i le fa’amoemoe, ‘e tāofia ai faiga ‘a kamupani ‘autū ‘e lua ia ‘e pulea supamaketi tetele ‘o lo’o iai nei ‘a Niu Sila, ‘ina ‘ia pa’ū ai le tau ‘o meataumafa, mai le tulaga taugata ‘o lo’o iai nei.

‘O lea fuafuaga, ‘o se vāega ‘o le latou faiga fa’avae, ‘e fa’aigoaina, ‘o le Affordable Kai, po’o le Taumafa Taugofie ‘e tusa le tau ma le $6 Piliona Tālā ‘i totonu ‘o tausaga ‘e fā, ‘e aofia ai ma le fa’alauteleina atu ‘o le polokalame lea ‘e maua fua ai mea’ai mō tamaiti ā’oga le school lunch programme.

Na fa’ailoa mai ‘e le tasi ‘o ta’ita’i ‘o le Greens ‘iā Chloe Swarbrick, ‘ua siliga taumafaiga ‘a faigāmālō ‘a Niu Sila, ‘e fa’atōsina mai se tasi kamupani telē mai fafo ‘e fa’afoeina supamaketi, ‘ina ‘ia maua ai se faiga fa’atauvaga ma kamupani ‘o le Foofdstuffs ma le Woolworths, ia la’ua te pulea ma fa’afoeina nei ia supamaketi tetele ‘i totonu ‘o le atunuu.

Sa ia tā’ua, ‘o le mafua’aga lea ‘ua fa’atūla’i mai ai ‘e le Greens lenei faiga fa’avae, mō le fa’atūina lea ‘o se supamaketi faitele ‘e pūlea ‘e tagata ‘uma ‘o Niu Sila.

‘Āfai ‘o le ‘a taunu’u lenei fuafuaga, ‘e mana’o le Greens, ‘e fa’aigoaina lenei supamaketi fou, ‘o le KiwiMart ma ‘o le ‘a ‘ave le fa’amuamua ‘i le fa’ataugōfieina ai ‘o meataumafa ‘uma ‘e maua ai.

‘O ia fuafuaga ‘uma ‘a lenei pātī, ‘o se vāega ‘o ā latou fa’atōsina mo le palota, ma ‘e fa’alagolago le fa’ataunu’uina, ‘i le saofagā ‘i totonu ‘o se faigāmālō ‘o le ‘a tūla’i mai pe ‘a uma le palota tele ia Nōvema.

Link to 1News (Article): https://www.1news.co.nz/2026/09/06/greens-propose-new-supermarket-chain-in-bid-to-cut-grocery-costs/

IMAGE/ATA: 1News