Mālō le mālō ‘i le fīnauga ‘i totogi ‘o leoleo

‘Ua manumālō le mālō Niu Sila, ‘i se fīnauga ‘ua leva ‘ona tūla’i mai ‘i le vā mā le Iuni ‘a le Vasega ‘o Leoleo, ‘e a’afia ai o lātou totogi.

‘E tusa ma le tausaga ‘ātoa talu ‘ona faia talanoaga ‘āloaia ‘i le vā ‘o itū ‘e lua, ma sā lē mafai ‘ona maua ai se māliliega, ‘ona tōfia ai lea ‘o se arbitrator, po’o se tagata tūto’atasi ‘e tū ‘i le vā ‘e faia se fa’ai’uga talafeagai ‘o lenei matā’upu.

 ‘O ia na tōfia ‘o le tama’ita’i lōia ‘e tomai fa’apitoa ‘i matā’upu tau gāluega, ‘o Vicki Campbell…ma ‘o le Aso Gafua ananafi lea na faia ai lana fa’ai’uga ‘ua ia talia ai le ‘ofa ‘a le Mālō, lea ‘e aofia ai se vaegātupe ‘e $1500 tālā mō leoleo ‘uma, ma le si’itaga ‘e $5000 afe tālā mō ‘ōfisa ma le ‘au fai tā’ai, fa’aopoopo ‘i ai ma le si’itaga lautele ‘o totogi ‘o leoleo ‘uma ‘e 4 pasene ‘iā Iūlai ma le isi 4 pasene ‘i le tausaga fou, 2025.

‘E lē gata ‘i lea, ‘ae ‘ua si’itia fo’i ma ‘alauni ‘o leoleo ‘i le aofa’iga ‘e 5.25 pasene ‘e ‘āmata ‘ona fa’amamalu mai ‘iā Nōvema ‘o le tausaga na te’a nei.

 ‘O le māsina ‘o ‘Aperila na tē’ena ai ‘e le ‘Asosi ‘a ali’i ma tama’ita’i leoleo se ‘ofa fa’apea sā iai ‘a le mālō mō lātou totogi.  ‘O la lātou finauga ‘e lē taitai fetaui lea si’itaga, mā ‘e iai le popōlega ‘o le ‘ā to’atele ai leoleo ‘e fa’amāvae ai mai le gāluega.

 Na fa’ailoa mai le lē fiafia ‘o le Sōsaiete ‘a leoleo ‘i le fa’ai’uga ‘e pei ‘ona tu’uina mai nei.  ‘E manatu le ‘asosi, ‘e pei ‘ua lima taitai’ina le arbitrator ‘ ‘i le mana’o ‘o le mālō ‘e fa’aitiitia tupe fa’aalu ‘i gāluega fai.

ATA: Police Commissioner Andrew Coster & Minister Hon. Mark Mitchell / Stuff.