Maliu le Palemia lona 35 ‘o Niu Sila, Sir Jim Bolger ‘i le 90 ‘o ona tausaga
‘Ua maliu Jim Bolger ‘i le 90 ‘o ona tausaga, ‘o lē sā ‘avea ma Palemia lona 35 ‘o Niu Sila ‘i le tele ‘o tausaga ‘i le vaitau ‘o le 90. ‘O mātua ‘o Bolger na mai Aielani, na malaga mai ma nonofo ‘i Niu Sila, ma fānau ai Bolger ‘i Ōpunake ‘i Taranaki ‘i le 1935. Sā tū mālosi fo’i a’o iai ‘i ‘Upufai ‘o mālō, ‘e fa’ataua le ‘ese’ese ‘o āganu’u, ma tu’u itiitia le fa’ailoga lanu.
Na ulufale ‘i ‘Upufai ‘o mālō auala mai ‘i le Federated Farmers, sā sui peresetene ai ‘i le lālā ‘i Waikato, ma mānumālō ai ‘i le nofoa fa’apālota mō le National ‘i King Country ‘i le 1972. ‘E 25 tausaga ‘o ia ‘umia le nofoa mō le ītūmālō. Sā fīnau mālosi Bolger ‘i taimi ‘o felafolafoa’iga ‘i totonu ‘o le Palemene a’o ‘avea ai ma sui faipule. ‘i le māe’a ai ‘o le faigāpālota ‘i le 1978, na filifilia ai Bolger ‘e ‘avea ma Minisitā ‘o le faigāmālō ‘a Mundoon. Ina ua faia’ina le National ‘i le pālota o le 1984, na ‘avea ai o ia ma sui ta’ita’i ‘o le vāega fa’a’upufai, ina ua sui tūlaga Jim McLay iā Sir Robert Muldoon.
Na filifilia Bolger ‘e ‘avea ma ta’ita’I ‘o le National a’o ‘avea ma ītū āgai ‘I le 1986, ina ua ‘ave’ese mai le tofiga iā McLay. Na manumālō le National ‘i le pālota ‘i le 1990, ma ‘avea ai Bolger ma palemia mō tausaga ‘e 7. ‘O le 1997 na pālota ai le vāega fa’a’upufai ‘e ‘ave’ese Bolger mai le tofi ta’ita’i, ona ua maitauina lona tu’u avanoa ‘i le NZ First, ona ‘o le taimi lea ‘o lo’o sē’ei mai le faigāmālō so’ofa’atasi ‘a le National ma le NZ First – lea na sui tūlaga iai Jenny Shipley. Na fa’amāvae mai ‘i le Palemene ‘o Niu Sila iā Aperila ‘i le 1998, ina ‘ua filifilia ‘e ‘avea ma amepasa ‘i Washington.
Na ta’ita’ifono ‘i le NZ Post, Kiwibank ma le state rail system ‘i lalo le faigāmālō ‘a le Leipa. ‘Ua momoli fa’amaisega a le palemia Christopher Luxon, ‘I lona ‘āiga. Ma e nate manatua Bolger, ‘o se ta’ita’i nate le’i fa’atagaina ni fīnauga ‘e a’afia ai ‘āiga ‘o sui faipule, ‘e ‘ese mai ma matā’upu talanoaina ‘i le palemene. Momoli mai fo’i fa’amaisega a le ta’ita’i ‘ le NZ First Winston Peters, lē sā ta’itaiina fa’atasi ma Bolger le faigāmālo so’ofa’atasi mai le 1996.
Link to RNZ (Article) translated: https://www.rnz.co.nz/news/national/576040/former-prime-minister-jim-bolger-dies-aged-90
ATA: RNZ / Rebekah Parsons-King