Maliu ‘i le lotoā ‘o le Palemene, ‘a’o fīnau ma le Faletupe ‘i le fa’atauga ‘o lona fale

‘O le taule’ale’a 50 tausaga lea na maliu ‘ona ‘o se fa’afītāuli na tula’i mai ‘i le lotoā ‘o le Palemene, sā fete’ena’i ma le faletupe ‘a le TSB lea sā taumafai ‘e fa’atau fa’amālosi ‘ese atu le fale sā nonofo ai ma lona tinā gasegase, (mortgagee sale) pei ‘ona tā’ua ‘e lona ‘āiga. 

Na maliu Dan Hone ‘ona ‘o ni manu’aga ogaoga ‘i le taeao ‘o le Aso Sā pei ‘ona lipotia ai ‘e le Post.  ‘Ua i lima ‘o le vāega su’esu’e ‘o tino māliliu le matā’upu.  ‘O le tala ‘a lona tuafafine ‘i luga ‘o le The Post, sā tausia ‘e Dan lona tinā sā a’afia ‘i le gasegase ‘o le māfaufau ‘i Uēligitone.  Peita’i, na tāpena le TSB ‘e fa’atau ‘ese atu le fale ‘i South Coast ‘ona ‘o ‘aitālafu ‘e le’i totogiina ‘o le fale.  Ma ‘ana fa’atau atu, ‘ua lēai se fale ‘e nonofo ai Hone ma lona tinā.  Na fa’atoluina le telē ‘o le telē ‘i le tolu tausaga talu ai ‘e totogi ‘o le mōkesi.  Na tu’uina atu se tusi mai lōia ‘a le TSB, ‘e fa’amaonia ai ‘ua āga’i le faletupe ‘e fa’atau fa’amālosi ‘ese atu le fale (mortgagee sale) ma lapata’iina fo’i le taule’ale’a, ‘o le ‘ā ‘āmata fa’asalalau le fale ‘e fa’atau atu.  ‘O le aso 5 Iulai na ‘āmata faia ai fa’atau tu’i ‘i le fale, ‘ae sā mafai ‘ona maua sina taimi pu’upu’u na toe fa’aui ‘ese ai le fa’asalaga ‘e ala ‘i le totogi ‘o se tupe ‘e $5000 ‘i le faletupe.  Na tā’ua fo’i ‘e le tuafafine ‘o Hone, sā gālulue mālosi ‘e fofō le fa’afītāuli peita’i sā lēai nisi ‘e fia fa’atauina le fale ma sāuni ai le faletupe ‘e va’aia le fale.  Na soso’o ai ma le ta lafo atu ‘o isi fe’au tusitusia mai lona tuagane ‘e fia maua se fesoasoani ‘e alu ‘ese ai ma Uēligitone, mā ‘o lona tinā fo’i, ‘ua matuā a’afia lona māfaufau.   ‘O lona tuagane ‘o se tagata lelei tele, ‘ae na fa’atuputupula’ia lava lona ita ‘i le faletupe fa’apea ma le Mālō.  ‘A’o le’i maliu le taule’ale’a, na ia tūsia ai ‘i luga ‘o ‘upegatafā’ilagi, ‘ua fāoa le fale mānaia ‘o si ona tinā sā fa’atau ‘i le 1981 ma ‘ua fa’anatinati ‘ona fa’atauina fa’amālosi ‘ese atu.  ‘Ua ia lē toe fa’atuatuaina faletupe ma ‘ua ‘ia lē toe talitonuina tele le mālō.  Na fa’aalia ‘e Penny Richards, le tausoga ‘’o le taule’ale’a, e tāua mō le Faigāmālō ‘ona māta’itū ma iloa tūlaga faigatā ‘o feagai ma ‘āiga.  ‘E lē na’o le pau lea ‘o le ‘āiga, ‘ae ‘e tele ‘āiga ‘o feagai ma ia tūlaga.  ‘E tele ‘au’aunaga fesoasoani ‘o lo’o avanoa ‘i totonu ‘o Niu Sila ‘e fa’atalatalanoa ai so’o se tasi ‘o feagai ma mafatiaga ‘o le soifuaga.

ATA: The Post.