Malaga faipule ‘i le Ngaaruawaahia ‘i le tu’umālō ‘o Kiingi Tuheitia

‘O le asō na malaga ai faipule ‘o le Palemene, ‘e fa’atino lo lātou fa’aaloalo ‘i le tu’umālō ai ‘o le tupu ‘o Māori, Kiingi Tuheitia ‘i Ngaaruawaahia.  Na ‘āuai Helen Clark ‘i le ‘aumalaga ‘a le Vāega Fa’a’upufai ‘a le Labour. 

Talu ai ‘ona ‘o se malaga ‘ua leva ‘ona fuafua ‘a le Palemia Christopher Luxon ‘i Meleisia ma Korea, ‘o le ala lea na malaga ai ‘i le Aso To’ona’i, e fa’atino ana fa’aaloaloga ‘i le tupu.  Sā malaga ‘i Meleisia ‘i le Aso Sā ‘ae fa’ato’ā toe taliu mai ‘i le atunu’uu ‘i le fa’ai’uga ‘o le vāiaso.  Sa ‘āuai fa’atasi Luxon, ma le Minisitā mō le atina’ega ‘o Māori, Tama Potaka fa’atasi ma Jenny Shipley, ‘o se tasi na ‘avea ma palemia fa’apea ai ma lē sa sui palemia Sir Don McKinnon, ma Dame Silvia Cartwright, sā ‘avea ma kōvana sili.  ‘O Vaovasamanaia Winston Peters, ‘o lo’o sui tūlaga ‘i le palemia ‘i le vaiaso nei, ma na ia ta’ita’ia le ‘aumalaga ‘a le mālō ‘i Tuurangawaewae ‘i le aoauli ‘o le asō.  Na iai fo’i le ta’ita’i ‘o le ACT, David Seymour ma nisi ‘o minisitā ‘o le mālō.  ‘O Shane Jones na saunoa ‘e fai ma sui ‘o le faigāmālō ‘i le pōwhiri. 

Na ta’ita’ia ‘e Chris Hipkins le ‘aumalaga ‘a le Labour ma ‘o le itūlā ‘e 8 ‘i le taeao analeila, na fa’afeiloa’ia ai ma isi iwi, ‘a’o le faigāmālō so’ofa’atasi ma le Greens ‘i le 2 ‘i le aoauli.   

Link to RNZ (Article) translated by Savelina Kasiano: https://www.rnz.co.nz/news/political/526928/politicians-to-pay-respects-to-kiingi-tuheitia-in-ngaaruawaahia

ATA: RNZ / Marika Khabazi.