Mafai ‘ona fa’asala mātua pe ‘ā tele aso lē ā’oga ‘o le tamaititi

‘Ua fa’ata’atia mai fuafuaga fou ‘a le mālō mō le fa’aleleia ‘o nūmera ‘o tamaiti ā’oga ‘e lē ō ‘i ā’oga, ‘e aofia ai le fa’asala ‘o mātua ma le ‘ave’esea ‘o Teachers Only Day ‘i totonu ‘o kuata. ‘Ua fuafua ‘e fa’alauiloa fa’amaumauga ‘o tamaiti ‘e ō ‘i ā’oga ‘i vaiaso ta’itasi, ma ta’iala mō le soifua mālōlōina, ‘i le itū’āiga ma’i ‘e tatau ai ‘ona tu’u tamaiti ‘i le fale, ma ‘o ā fo’i aiaiga pe ‘ā ma’i ‘e mafai ai ‘ona ‘ave pea ‘i ā’oga.

‘O le ‘ā fa’aaogāina ‘e ā’oga ta’itasi le polokalame ‘o le STAR System ‘i le ‘amataga ‘o le 2026. Fa’ata’ita’iga – ‘Ā 5 aso lē ā’oga ‘o le tamaittii, ‘e tatau ‘ona feso’ota’i atu le ā’oga ‘e fesiligia mafua’aga tonu na lē ā’oga ai. ‘A 10 aso lē ā’oga, ‘ona talo lea ‘o se fono ‘a le ā’oga ma mātua ‘o le tamaititi, ‘e iloilo po’o ‘a pā puipui ‘e lē mafai ai ‘ona alu atu le tamaititi ‘i le ā’oga.’Ā o’o ‘i le 15 aso lē ā’oga, ‘ua aofia loa le Matāgāluega ‘o ā’oga ‘i le matā’upu, ma fuafua se fa’asalaga mō mātua.

Link to RNZ (Article) translated by Anna Fa’asolo: https://www.rnz.co.nz/news/top/529079/crackdown-on-teacher-only-days-parents-face-prosecutions-in-truancy-push

ATA: Sāmoa Capital Radio (file).