Mafai e se tēkonolosi fou ona fa’aauau feso’ota’iga ‘i taimi o fa’alavelave

‘Ua faia se isi itū’āiga tēkonolosi fou mō feso’ota’iga nu’u ‘i Tai Rāwhiti ‘auā le puipuiga ‘i taimi o fa’alavelave – ‘e tusa lava pē tapē uma isi feso’ota’iga. ‘I le taimi o le afā o Gabrielle, na motusia ai le ‘eletise ma laina telefoni fe’avea’i ‘i le tele ‘o vāega o Gisborne ma Hawke’s Bay, ‘ae o lea ‘ua maua e Tai Rāwhiti se fōfō, ‘o se isi vāega o lana pusa fou mō sauniuniga mō fa’alavelave fa’alenātura.’O le āga’i ‘i luga atu o le talafātai ‘i Sasa’e o lo’o iai le Puketiti Station, ‘e 100 kilomita mai Gisborne, ma o lo’o faia ai fa’ata’ita’iga o se mea faigāluega fou mō feso’ota’iga, ‘e faaigoaina o le mesh node.

’O le ‘mesh node’ ‘o se tama’i masini lanu uliuli ‘e feso’ota’i ma se telefoni fe’avea’i ‘auala atu ‘i le Bluetooth. Ona fa’afeso’ota’i lea ‘i se feso’ota’iga o nodes fa’aola ‘i mālosi’aga mai le lā, ‘e maua i le pitonu’u ātoa, ‘e mafai ai e tagata  ona lafo ni fe’au pupu’u, e tusa lava pē fa’alētonu uma isi feso’ota’iga. Fa’aalia e le pulenu’u ‘o Gisbourne Rehette Stoltz, ‘o le fa’afītāuli tele na tula’i mai ‘i le taimi o tāfega ma lōlōga ‘i le pitonu’u, ‘o le motusia lea o laina mō feso’ota’iga, ‘ae ‘ātonu ‘o le ‘ā fesoasoani lea masini fa’atēkonolosi fou ‘i tagata ‘o le ‘a’ai.

Link to RNZ (Article) translated by Anna Faasolo: https://www.rnz.co.nz/news/national/535819/new-technology-could-keep-communications-going-during-disasters

ATA: RNZ