Lua ‘o vaetolu tamaiti Niu Sila ‘e lē sa’o le ‘u’uga ‘o le penitala

‘E lata ‘i le to’a 800 tamaiti na tulimata’iina ‘a’o lātou tusiina mata’itusi ‘o le ‘alafapeti ‘i totonu ‘o le minute ‘e tasi.  Na māu’a ‘i le sā’ili’iliga, ‘e lua ‘o vaetolu ‘o tamaiti Niu Sila, ‘e lē sa’o ‘ona ‘u’u le penitala. 

Na ta’ita’ia ‘e le Iunivesitē ‘o Otago se vāega su’esu’e na o lātou faia le iloiloga.  ‘E ui sā māsani ‘ona iai le manatu, ‘e fa’apea ‘o le ‘u’uina ‘o le penitala ‘i tamatama‘ilima ‘e tolu (tripod grip) ‘o le ‘auala lea ‘e sili ‘ona talafeagai, ‘ae na iloa ‘e le ‘au su‘esu‘e ‘e tusa ma le ‘afa ‘o tamaiti sā fa‘aaogāina le ‘auala ‘e ta’ua ‘o le thumb wrap grip, po’o le āfīfī pe ta’amilo fo’i le limamatua ‘i le penitala. Sā ta’atele fo‘i ‘ona fa‘aaogāina le ‘auala ‘e ‘u’u ai le penitala ‘i le vā ‘o le lima matua ma le limatusi, ‘ae sulu le limamatua ‘i lalo ‘o le limatusi ma fa’aui atu le penitala ‘i lalo ‘o le tama’ilima ‘ōgātotonu po’o le loaloavale,  ‘ia po’o le fa’aperetānia ‘o le (thumb tuck) pei ‘ona saunoa Jenny Ward, lē na ta’iulu ‘i le sā’ili’iliga.

‘E ui ‘e lē mafai ‘ona iloa ‘i le itū’āiga ‘u’uga ‘o le penitala, le sōloga lelei ‘o le tusitusi ‘a se tamaitiiti, peita’i, ‘e mafai ‘ona iai ni fa’afītāuli po’o nisi vaivaiga ‘e tusa ai ma su’esu’ega, ‘e aofia ai le vave ma le tuai fa’apea fo’i le mālosi’aga ‘e tusi ai mata’itusi.

Na iai nisi tamaiti sā faigatā atu ‘ona lātou tusiina ni mata’itusi nai lō isi.  ‘O le mata’itusi ‘o le k, sā mātilatila lava, ‘ona ‘e lata ‘i le lua ‘o vaetolu, sā le’i sa’o lona tusiga.  Sā faigatā fo’i ‘i nisi le tusiga ‘o le mata’itusi ‘o le f ma le j, ma ‘e 34 pasene ma le 28 pasene na le’i sa’o ‘ona tusiina.

‘E le’o fa’ate’ia le faiā’oga mō le Tusitusi, Helen Walls, ‘i le fa’ai’uga ‘o lea sā’ili’iliga.   Na ia tā’ua, ‘o faiā’oga ia na ā’o’oga pe a’oa’oina ‘ina ‘ua tuana’i le tausaga 2000, ‘e na’o le 10 pasene ‘o ‘i lātou, na taulimaina ni fa’atonuga ‘i le ‘auala ‘e a’oa’o ai le tusilima ‘i le taimi po’o tausaga na ā’o’oga ai ‘e ‘avea ma faiā’oga.

Na iai fo‘i ni a‘afiaga ‘o lenei tūlaga ‘i le itūpā ‘o tama.  Na tā‘ua ‘e Walls, ‘ā va‘ai se tamaitiiti ‘i tusitusiga matagōfie ‘a se isi tamaitiiti, ‘ae va‘ai atu ‘i ana tusitusiga ‘e pei ‘o tusitusiga ‘a se pepe, ‘ona manatu lea, ‘o ia ‘e lē lelei lana tusitusi.

‘I le lalolagi ‘ua fa‘ateleina ai le fa‘aaogāga ‘o masini fa‘atēkonolosi, ‘ua iloa ‘e saienitisi ‘o le fai‘ai (neuroscientists) ‘e tele aogā ‘o le tusitusi po’o le tusilima.  Na ia fa’aalia, fa‘ata‘ita‘i ‘e tamaiti le tusi ‘e le lima ‘o le vaevaega ‘o ‘upu pe ‘ā fa’aleo (phonics patterns), ‘e fa‘agaoioi ai se vāega ‘o le fai‘ai ‘e fesoasoani ‘i ana a’oa’oga. Peita‘i, ‘ā fai na’o le tā lava ‘o mata‘itusi ‘i le komepiuta, ‘e lē gaioi ai le fai’ai.   Na tā‘ua ‘e le Minisitā ‘o Ā‘oga ‘o lo’o va’aia nei le Matāgaluega, Erica Stanford, ‘o le teuteuga fou lea ‘ua faia ‘i le polokalame mō ā’oga, ‘ua fa‘atūlaga manino ai vāega ‘e tatau ‘ona ‘ausia ‘e tamaiti ‘i le tusi lima pei ‘ona tā’ua ‘e le 1News.

Link to 1News (Article): https://www.1news.co.nz/2026/11/11/two-thirds-of-kiwi-kids-using-incorrect-pencil-grip-study/

IMAGE/ATA: SCR (file).