Loka ‘au taufa’asesē ‘e faia fa’amālōlōga ‘i le agaga

‘E to’atolu ni ‘au taufa’asesē na masalomia lo lātou ‘olegiaina ‘o ni tagata ‘e fa’apea lātou te fa’amālōlōina ‘i lātou ma o lātou ‘āiga pe ‘ā fai ‘ua fa’amālaiaina ‘i lātou, ‘ae totogi ‘i ni tupe po’o ni meatōtino tāua.  Peita’i na lokaina ‘e leoleo ia tagatā nu’u Saina ‘e to’atolu, ‘o se tamā ‘e 50 tausaga le matua, ma ni tama’ita’i se to’alua ‘e 59 ma le 53 tausaga le mātutua, ‘i le malae va’alele fa’avāomālō ‘i ‘Aukilani ‘i le Aso Lua. 

‘I se pepa ‘o fa’amatalaga na fa’aalia ai ‘e leoleo, na taunu’u ia tagata ‘e to’atolu ‘i Niu Sila ‘i le māsina ‘o ‘Oketopa ma ‘āmata fa’atino loa lea faiga taufa’asesē.  Na fa’aalia ‘e le sātini sinia Craig Bolton, ‘e to’atasi se tagata na gau ana ‘oloa teuteu tino ‘e $14,500 le tau ma le isi tagata na gau ai lana tupe ‘e $15,000.  Na fa’aalia ‘e Bolton, ‘e ui ‘e to’alua lea ‘ua mautinoa ‘ua fa’asesēina ‘i lea faiga taufa’avalea, ‘e iai le talitonuga, ‘e ono iai ma nisi tagatā nu’u Saina ‘ua sesē ai. 

Link to RNZ (Article) translated by Savelina Kasiano: https://www.rnz.co.nz/news/national/533035/alleged-scammers-posing-as-spiritual-practitioners-arrested

ATA: Money seized by police. Supplied (Police).