Legalegā ma susū fale ‘o nonofo ai nisi tagata mau totogi ‘i ‘Aukilani

Na fa’aalia ‘e nisi ‘o tagata nonofo mau totogi ‘i ‘Aukilani, ‘o lo’o feagai pea ‘i lātou ma ni fale ‘e lē gata ‘i le susū, legalegā, ‘ae alu ai le silia ma le ‘afa ‘o lātou totogi ‘i le vāiaso, ‘i le tau ‘o fale.  ‘O fa’amaumauga na fa’alauiloaina ‘i le vāiaso nei ‘e le TradeMe, na tā’ua ai le nā’o le $5 ‘ua pa’ū ai le tau ‘o fale nofo mautotogi ‘i le vāiaso ‘i ‘Aukilani mai le māsina ‘o ‘Aukuso peita’i, ‘o lo’o maualuga atu pea nai lō le tausaga talu ai.  Na fa’aalia ‘e tagata nofo mautotogi, lātou te le’i maua lava se fa’amāmā ‘avega ‘e ui ‘i fa’amatalaga ‘a le Mālō ‘i le māsina ‘o Mati ‘e fa’apea, ‘o le fa’ataga ‘o tagata ‘e ona fale nofo mautotogi (landlords) ‘e fa’amāgalo pasene tului ‘o a lātou mōkesi, ‘o le ‘ā pa’ū ai le tau ‘e totogi ‘e tagata nofo mau totogi (renters). 

Na fa’amatala ‘e Alexandra Andrews 27 tausaga le matua, na nofo mautotogi mai lava ‘o 18 ona tausaga, ma ‘o fale ‘uma na nofo ai, ‘e tele tele mea sā mo’omia ‘ona fa’aleleia.  Na o lātou faia ma ana uō na o lātou nonofo fa’atasi, se tagi ‘i le Tenancy Tribunal, ma mālō ai, ‘ina ‘ua tu’u atu le fa’atonuga ‘e ō ‘ese ai ma le fale, talu ai le mumusu ‘e totogi le $100 fa’aopoopo ‘i le vāiaso ‘o le rent pei ‘ona tā’ua ‘i le Leitiō Niu Sila. 

Na fa’aalia fo’i ‘e se tasi tagata nofo mautotogi ‘i le ‘ōgātotonu ‘o ‘Aukilani, ‘e silia ma le 60 pasene ‘o lana tupe maua, ‘e alu ‘i le totōgiga ‘o lona fale.  ‘Ua lima tausaga ‘o nofo ai ‘i lea fale, ‘ae alu lava ‘i luga le tau.  Na fa’ato’ā ‘uma fo’i ‘ona fa’ailoa atu ‘iā te ia, ‘o le ‘ā toe si’i fo’i, ma ‘ua tu’u fa’afeagai ma le saunoaga ‘a le mālō ‘e fa’apea ‘a maua le fa’amāmā ‘avega mō tagata ‘e ona fale nofo mautotogi (landlords), ‘o le ‘ā manuia ai fo’i tagata nofo mautotogi. 

Na fa’aalia ‘e le so’o’upu ‘a le Green mō matā’upu ‘o fale, Tamatha Paul, ‘o se tama’ita’i faipule ‘o lo’o nofo mautotogi, ‘e lēai se fesoasoani ‘o maua ‘e tagata nofo mautotogi, mai le  faamagalo ‘o pasene tului ‘o mōkesi mō landlords, ma ‘e lēai fo’i ni fa’amaoniga ‘e lagolago ai folafolaga ia ‘o lo’o faia ‘e ala ‘i pōlisi nei ‘o lo’o manuia ai tagata ‘e ona fale nofo mautotogi po’o landlords.  Na fa’aalia ‘e le ta’ita’i ‘o le ACT David Seymour, ‘e tūmau pea lona lagolagoina ‘o ana saunoaga ia na faia, ‘e fa’apea ‘ā fa’apa’ū lāfoga mō tagata ‘e ona fale nofo mautotogi po’o landlords, ‘o le ‘ā fesoasoani ai fo’i mō tagata nofo mautotogi (renters).

Link to RNZ (article) translated by Savelina Kasiano: https://www.rnz.co.nz/news/business/532375/auckland-renters-struggling-with-mouldy-damp-homes-and-no-sense-of-security

Ata: RNZ/SUPPLIED