Lēai se uiga ‘e tāofia ai tamaiti mai le fa’aaogāaga ‘o ‘upega ‘o feso’ota’iga (social media) – Netsafe

‘O le valaʻau ‘ina ‘ia faʻasā tamaiti ‘i lalo ifo ‘o le ta’i 16 tausaga ‘ona fa’aaogā ‘upega ‘o feso’ota’iga po’o social media, ‘o le ‘ā lē fofōina ai fa’afītāuli moni ‘o loʻo feagai ma tupulaga talavou ‘i luga ‘o le ‘initaneti, ‘e tusa ai ma fa’amatalaga ‘a le Netsafe. Na ta’utino le palemia ‘o ‘Ausetālia ‘i sana fa’asalalauga fa’alaua’itele, ‘ua fuafua ‘e tāofia tamaiti ‘e i lalo ifo ‘o le ta’i 16 tausaga mai le fa’aaogāaga ‘o ‘upega ‘o feso’ota’iga. Na fa’ailoa ‘e le palemia ‘o Niu SIla Christopher Luxon, ‘o le ‘ā va’ava’ai Niu Sila ‘i se fuafuaga fa’apea, peita’i na tā’ua ‘e le pulesili ‘o le Netsafe Brent Carey, ‘o le tāofia ‘o le fa’aaogāaga ‘e tamaiti ‘o le social media, ‘o le ‘ā fa’atuputupula’ia ai fa’afītāuli ‘i tupulaga talavou lāiti.

‘A fa’apea ‘e mafai ‘ona tātou tu’ua ā tātou fānau ta’i 14 tausaga ‘e va’aia ‘o lātou tei lāiti, pe tu’u fo’i na’o lātou ‘i le fale, ‘e tatau fo’i ‘ona fa’ataga ona fa’aaogā ‘upega ‘o feso’otai’ga ‘e talanoa ma feso’ota’i ai ma ā lātou uō. Saunoa Carey, ‘o le ‘amataga ‘o le tausaga lea na ’āmata fa’amamaluina ai le tāofia ‘o le fa’aaogāaga ‘e fānau ā’oga ‘o telefoni ‘i ā’oga, ‘e lēai se ā’oga ‘i tamaiti ā’oga, ‘ona ‘o lo’o maua pea le avanoa ‘e fa’aaogā ai isi komepiuta fa’atekonolosi. ‘O le fa’afītāuli moni, pei ‘ona fa’aalia ‘e Carey, ‘o matā’upu ‘e fa’aaogā ai tekonolosi.’O le vaʻavaʻai ‘i ā tātou matā’upu tau le a’oa’oga, ‘e ‘aumaia ai ‘i totonu a’oa’oga tau tekonolosi,’e faʻaosofia ai le tupulaga ‘e mafaufau loloto ‘e uiga ‘i ō lātou avanoa ma vāega ‘o loʻo lātou ‘āuai ai. ‘E lē gata ‘i lea ‘o fa’afītāuli ‘i amioga – ‘o le ā se mea tātou te manana’o ‘e vaʻaia ‘i ā tātou tupulaga talavou mō le lumana’i?

Na fa’aalia ‘i su’esu’ega na faia muamua ‘e le Netsafe, ‘o loʻo matuaʻi lelei lava le fa’aaogāaga ‘e tamaiti ‘o le ‘initaneti. ‘E tāua ‘i mātua le mālamalama ‘i ‘upega ‘o feso’ota’iga ‘ese’ese ‘o lo’o fa’aaogā ‘e tamaiti, ‘e iai le Snapchat, facebook po’o le META, Instagram ma isi. ‘O le itū lelei, ‘ina ‘ia taumafai mātua ‘e tapu’e mai i fānau,  ma mālamalama ‘i le fa’aaogāaga ‘o ‘upega ‘o feso’ota’iga fa’aonapō nei. Na lagolagoina ‘e le ta’ita’i ‘o le Leipa Chris Hipkins, lea fuafuaga ‘a ‘Ausetālia.

Link to RNZ (Article) translated by Anna Fa’asolo: https://www.rnz.co.nz/news/national/527839/banning-kids-from-social-media-won-t-solve-anything-netsafe

ATA: RNZ