Lēai se uiga ‘e kopi ai fua le tūlāfono ‘a ‘Ausetālia – EMA

‘E matuā lēai lava se uiga ‘e fa’aofi ai se tūlāfono fou mō fale faigāluega ‘e maua ai ‘e tagata faigāluega le aiā tatau ‘e ‘aua ai ne’i tali pe ‘ā feso’ota’i atu o lātou pule ‘ae ‘ua ‘uma taimi faigāluega, ‘e tusa ai ma se finagalo ‘o le ‘Asosi ‘o Fale Faigāluega ma Kamupanī gaosi ‘oloa. 

‘E faitau miliona tagata faigāluega ‘i ‘Ausetalia ‘ua mafai nei ‘ona iai la lātou aiā tatau ‘e tē’ena ai se telefoni po’o se feso’ota’iga mai o lātou fale faigāluega, pe ‘ā ‘uma taimi fa’atūlagaina ‘o gāluega.   ‘O le Aso Gafua lea na ‘āmata fa’amamaluina ai lea tūlāfono.  ‘E lē mafai ‘e pule ma fale faigāluega ‘ona fa’asala tagata faigāluega ‘e lē talia a lātou telefoni ‘i taimi ‘e ‘uma ai a lātou sifi, ‘i lalo ‘o le Tūlāfono ‘o le Right to Disconnect Law.  ‘O le fa’anaunauga ‘o le fa’aulūuluga ‘o le ‘Asosi ‘o Fale Faigāluega ma Kamupanī gaosi ‘oloa, Alan McDonald, ‘ia ‘aua lava ne’i fa’aulufale mai lea tūlāfono ‘i Niu Sila.  ‘O lea ‘ua lava ma totoe tūlāfono ‘i fale faigāluega, ‘ae ‘āfai ‘e mo’omia, ‘e mafai lava ‘e le tagata ‘ona talanoa ‘i lana fale faigāluega, ‘ina ‘ia ‘aua ne’i toe vili atu pe ‘ā māe’a taimi faigāluega.

Link to RNZ (Article) translated by Savelina Kasiano: https://www.rnz.co.nz/news/national/526261/pointless-to-copy-australia-s-right-to-disconnect-law-ema

ATA: Sāmoa Capital Radio (file).