Lēai se tau mō le tui puipui ‘o le flu mō tamaiti ‘i lalo ‘o le 5 tausaga

‘O le ‘ā lēai se tau ‘e totogi mō le tui puipui ‘o le fulū mō tamaiti ‘i lalo ‘o le ta’i lima tausaga le mātutua ‘āmata atu ‘i le tausaga ‘ā sau.  Na vala’au fōma’i ‘ina ‘ia fa’atupe ‘āto’atoa ‘e le mālō se tui puipui mō tamaiti.  Na si’itia maualuga le tele ‘o tagata a’afia ‘i le influenza i le tausaga nei.   ‘Ua pito sili ‘ona to’atele tamaiti ‘i lalo ‘o le ta’i lima tausaga ‘e ‘ave ‘i falema’i ‘aemaise lava ‘i Māori ma tamaiti Pasefika.

Na fa’aalia ‘e Adrienne Martin ‘o se tasi ‘o fa’auluuluga ‘o le Pharmac, ‘o lea suiga, ‘o le ‘ā mafai ai ‘e le tusa ma le to’a 260,000 ‘o tamaiti ‘e mafai ‘ona agava’a ‘i le tui puipui, mai le ta’i 6 māsina se’ia o’o atu ‘i le ta’i lima tausaga le mātutua. 

‘O le taimi nei, ‘e na’o tamaiti ‘i lalo ‘o le ta’i lima tausaga ‘e lēai se totogi ‘o le tui puipui ‘o le fulū pe ‘ā fai na taofia ‘i falema’i ‘ona ‘o ni ma’i ‘e āfāina ai o lātou ālā ‘ea mānava po’o le a’afia fo’i ‘i nisi gasegase ‘e pei ‘o le ma’i suka, ma’i sela po’o ma’i ‘e a’afia ai le fatu.   

Na tusi atu fōma’i GPs ‘e fai ma sui ‘o le Royal New Zealand College of General Practitioners, ‘e talosagaina ai le Soifua Mālōlōina ‘a Niu Sila, ‘ina ‘ia vave fa’atupe avanoa ‘e agava’a ai ‘i tui puipui ‘o le fulū, ‘aemaise lava ‘i tamaiti ‘i lalo ‘o le ta’i lima tausaga. 

Na finagalo fo’i fōma’i ‘ina ‘ia tu’u ‘i lalo ‘i le 55 tausaga mai le 65 ‘o lo’o iai, le matua ‘e agava’a ai mō le tui puipui ‘e lēai se tau ‘e totogi mō tagata ‘e pito sili ‘ona a’afia gōfie ‘e pei ‘o Māori ma tagata Pasefika fa’apea ai ma tagata ‘o lo’o aumau ‘i nu’u po’o vāega ‘o le atunu’u ‘e pito sili ‘ona maualalo le tamāo’āiga.

Link to RNZ (Article): https://www.rnz.co.nz/news/health/1131646/flu-vaccine-to-be-free-for-all-under-fives

IMAGE/ATA: SCR (file).