Lē toe maua se penefiti ‘e talavou 18-19 tausaga

‘Ua fa’ailoa mai ‘e le faigāmālō so’ofa’atasi ‘a Niu Sila, lana fuafuaga ‘e fa’amālosia ai mātua ‘e sili atu ‘i le $65,000 ‘i le tausaga a lātou tupe maua, ‘e lagolago ma fesoasoani ‘iā lātou fānau ‘i le vā ‘o le 18 ma le 19 tausaga le mātutua.

‘O lenei fuafuaga ‘a le mālō, ‘e pei ‘ona fa’ailoa mai ‘i le Aso Sā ananafi, ‘e le palemia ‘iā Christopher Luxon ma le Minisitā ‘o le Ātina’e Lautele ma Gāluega, ‘o Louise Upston, ‘o le ‘ā lē toe maua ai ‘e talavou nei 18 ma le 19 tausaga se penefiti su’e gāluega, le job seeker benefit, pe ‘ā fai ‘e maua ‘e ō lātou mātua le ītū’āiga ‘o totogi ma tupe maua ia ‘e sili atu ma le $65,000 ‘i le tausaga.

‘O le mana’o ‘o le Mālō, ‘ina ‘ia ‘ave’esea talavou nei mai le penefiti su’e gāluega, ‘ae tausi pea ma lagolago ‘e ō lātou mātua, ‘e sili atu ‘i le $65,000 le tu’uaofa’iga ‘o ā lātou tupe maua ‘i le tausaga.

‘O lenei suiga ‘ua fa’amoemoe le mālō, ‘e ‘āmata ‘ona fa’amamalu ‘iā Nōvema ‘o le tausaga ‘ā sau 2026.

‘E manatu ‘i lātou ‘e tete’e ‘i lenei fuafuaga, ‘e tatau ‘ona si’i atu ‘i luga ‘o le $65,000 tupe maua ‘e mātua ‘ina ‘ia gāfatia ai lenei tulaga.

‘O le taimi nei pei ‘ona sau ai ‘i tausaga ‘e tele le fesoasoani po’o le penefiti lenei ‘o le job seeker benefit, ‘o lo’o agava’a ‘i ai so’o se talavou ‘ua aulia le 18 tausaga le matua, ‘e fa’atali ai le maua ‘o ni ā lātou gāluega tūmau.

‘O lenei fuafuaga sā aofia ‘i le Tala Fa’atatau ‘Autū ‘o le Tupe ‘a le Mālō, ma sā mua’i fa’amoemoe ‘e fa’ato’ā ‘āmata ‘iā Iūlai ‘o le 2027  peita’i, ‘o lea ‘ua tu’u mai ‘i luma ‘i le tausaga fou, 2026.

Link to RNZ (Article) translated: https://www.rnz.co.nz/news/political/575025/jobseeker-parents-earning-more-than-65k-must-support-18-19yo-children

ATA:  RNZ / Kim Baker Wilson.